काङ्ग्रेसभित्रको आन्तरिक प्रतिस्पर्धा स्वभाविकः एकताबद्ध भएर अघि बढ्न उम्मेदवार थापाको आग्रह

राजनीति

Home
राजनीति
काङ्ग्रेसभित्रको आन्तरिक प्रतिस्पर्धा स्वभाविकः एकताबद्ध भएर अघि बढ्न उम्मेदवार थापाको आग्रह

काङ्ग्रेसभित्रको आन्तरिक प्रतिस्पर्धा स्वभाविकः एकताबद्ध भएर अघि बढ्न उम्मेदवार थापाको आग्रह

परासी । प्रतिनिधि सभाको निर्वाचन फाल्गुन २१ का लागि तय भएको छ । विभिन्न दलहरूले चुनावमा जाने रणनीति तयार गर्न थालेका छन्। कतिपय दलहरूले आफ्नो चुनावी घोषणापत्र सार्वजनिक गरिसकेका छन्। नवलपरासीमा दुईवटा निर्वाचन क्षेत्र छन्। दुईवटा निर्वाचन क्षेत्रमा ५५ जनाको उम्मेदवारी परेको छ। मुख्य दल नेपाली कांग्रेस, नेकपा एमाले, नेपाली कम्युनिस्ट पार्टी, राष्ट्रिय स्वतन्त्र पार्टी, राष्ट्रिय प्रजातन्त्र पार्टी र जनता समाजवादी पार्टी बीच नै प्रतिस्पर्धा हुने देखिएको छ।

चुनावमा प्रचारप्रसारका लागि जानु अघि नेपाली कांग्रेस नवलपरासी क्षेत्र नम्बर २ का उम्मेदवार भीमबहादुर थापा 'भरत' ले आइतबार पत्रकार सम्मेलन गरी आफु पार्टीको आधिकारिक उम्मेदवार भएकोले अब टिकटका विषयमा बहस गर्न आवश्यक नभएको बताउनुभएको छ। उहाँले नेपाली काङ्ग्रेस लामो इतिहास बोकेको र लोकतान्त्रिक पार्टी भएकोले चुनावका बेला पार्टीभित्र आन्तरिक प्रतिस्पर्धा हुनु स्वभाविक विषय भएको बताउँदै उत्पन्न विवाद अब समाधान भइसकेकोले एकताबद्ध भएर चुनावी अभियानमा जान नेता तथा कार्यकर्ताहरूलाई आह्वान समेत गर्नुभएको छ।

उम्मेदवार थापाले आफू यसअघि सुनवल नगरपालिकाको नगरप्रमुख हुँदा गरेका महत्त्वपूर्ण र ऐतिहासिक कामहरूको समीक्षा गर्नुभएको छ। उहाँले यस क्षेत्रको विभिन्न जिम्मेवारीमा रहँदा निष्ठापूर्वक काम गरेको र आर्थिक सामाजिक क्षेत्रको विकासमा योगदान पुर्‍याएकोले थप जिम्मेवारी लिन प्रतिनिधि सभामा उठ्न लागेको बताउनुभयो।

थापाले आफू सुनवल नगरपालिकाको नगरप्रमुख हुँदा कुनै पनि सेवा सुविधा नलिई प्राप्त रकमलाई सुनवलका विभिन्न क्षेत्रमा लगानी गरी बाँकी रहेको १९ लाख रुपैयाँ नगरको सञ्चित कोषमा जम्मा गरेको बताउनुभयो । सुनवल नगरपालिकाको प्रशासकीय भवन, १२ वटै वडामा महिला उद्यम केन्द्र निर्माण, सुनवल हिल पार्क, सडक तथा पूर्वाधार र आर्थिक विकासमा सयौँ काम गरेकोले अबको नेतृत्व आफ्नो पक्षमा आउने दाबी समेत गर्नुभएको छ।

प्रकाशित मिति: सोमबार, माघ १२, २०८२ ०९:१२

प्रतिक्रिया दिनुहोस्