सुनवल । नेकपा एमाले नवलपरासी क्षेत्र नं. २ का उम्मेदवार लेखनाथ खरेलले निर्वाचन परिणाम आफ्नो पक्षमा आउने दावी गर्नु भएको छ । उहाँले चुनाव केन्द्रीत वडा भेलामा कार्यकर्ताहरूलाई सक्रिय र सशक्त भएर जुट्न आग्रह गर्नु भएको हो ।
क्षेत्र नं. २ अन्तर्गतका सुनवल र रामग्राम नगरपालिका, पाल्हीनन्दन र सरावल गाउँपालिकाका विभिन्न वडाहरूमा दैनिकजसो पुगेर वडाका नेता तथा कार्यकर्ताहरूमाझ भेटघाटलाई तिब्रता दिइरहनु भएको छ ।
उम्मेदवार खरेलले आफ्नो राजनीति व्यक्तिगत स्वार्थका लागि नभई विकास, समृद्धि र राष्ट्रियताकालागि भएको बताउनु भयो । उहाँले नवलपरासी क्षेत्र नं. २ मा जतिपनि पूर्वाधार, पुलपुलेसा र विकास निर्माणको काम भएका छन ती सबै नेकपा एमालेको नेतृत्वमा भएको दावी गर्दै आगामी दिनमा पनि एमाले निर्णायक राष्ट्रिय शक्ति हुने दावी गर्नुभयो ।
आज रामग्राम नगरपालिका वडा नं. ३, सुनवल नगरपालिका वडा नं ५ लगायतका क्षेत्रमा नेता कार्यकताहरुसँग भेटघाट गर्दै सूर्य चिन्हमा मतदान गर्न समुदाय परिचालन गर्न आग्रह गर्नु भएको हो ।
सो अवसरमा एमालेका नेता तथा लुम्बिनी प्रदेशका पूर्वमन्त्री बैजनाथ चौधरी, केन्द्रीय कमिटि सदस्य बिमला अर्याल, लक्ष्मि क्षेत्री लगायतले कार्यकर्ता तथा मतदाताहरूसँग भलाकुसारी गर्नु भएको एमाले चुनाव प्रचार प्रसार समितिले जनाएको छ ।
यसैबीच नेकपा एमाले निकट अखिल नेपाल महिला संघ रामग्राम नगर स्तरीय भेला परासीमा सम्पन्न भएको छ । अनेमसंघ नगर अध्यक्ष रजनी ढकालको अध्यक्षता र नेकपा एमालेकी केन्द्रीय सदस्य लक्ष्मी क्षेत्रीको प्रमुख आतिथ्यमा भेला गरिएको हो ।
सो अवसरमा नवलपरासी क्षेत्र नं. २ का उम्मेदवार लेखनाथ खरेल, एमाले नेता खिमलाल पोख्रेल, तारा नेपाल लगायतले बोल्नु भएको एमाले नेतृ सरीता पौडेलले जानकारी दिनुभयो ।
सम्पन्न भेलाले निर्वाचन परिचालनका लागि १०३ सदस्य कमिटि निर्माण गरेको छ भने रामग्राम नगरपालिका भित्रका १८ वटै वडाहरुमा अनेसंघको वडा भेला गर्ने निर्णय गरेको छ ।
