परासी । निर्वाचन प्रचार प्रसारका क्रममा नवलपरासीमा प्रमुख दलका उम्मेदवारहरू घरदैलो अभियानमा व्यस्त रहेका छन् । आकर्षक नारा, साउण्ड सिस्टम तथा झण्डा व्यानर सहित घरदैलोमा मतदाता भेटघाटमा देखिएका छन् ।
पार्टी केन्द्रित गीत संगित बजाउँदै हातमा पार्टीको झण्डा र चुनाव चिन्ह बोकेर नाचेको—रमाएको पनि देखिन्थ्यो । मतदाताका बीचमा उम्मेदवारले आफ्ना प्रतिवद्धताहरू सुनाउने र भोटका लागि आब्हान पनि गरिरहेका छन् । पार्टीका कार्यकर्ता, नेताहरूले घोषणा पत्र मतदातालाई वितरण गर्दै मतदानका लागि अनुरोध गरिरहेका देखिन्थे ।
नवलपरासी क्षेत्र नम्बर २ का नेपाली कांग्रेसका उम्मेदवार भीमबहादुर थापाले क्षेत्र नं. २ का पाल्हीनन्दन, रामग्राम र सुनवलका विभिन्न वडाहरूमा मतदाता भेटघाट गर्दै रुख चुनाव चिन्हमा मतदान गर्न आब्हान गर्नु भएको छ ।
बिहिबार रामग्राम ९ जोकवारमा घरदैलो गर्दै गर्दा उम्मेदवार थापाले लाई भोजपुरी भाषामा बोल्न हम्मेहम्मे नै परेको देखिन्थ्यो । आफ्नो चुनावी प्रतिवद्धता संझौउँदै भोजपुरी भाषामा रामग्राम नगरपालिकाका मतदातालाई उम्मेदवार थापाले “यसपटकको चुनाव फकर भएको भन्दै जबसम्म महिलाहरूको विकास हुँदैन तबसम्म समाज सुधारिदैन भन्नु भयो ” । नेपाली भाषी थापालाई भोजपुरी भाषा बोल्दा निकै समस्या भएको देखिन्थ्यो । तरपनि उहाँले नजिकैमा रहेका भोजपुरी भाषी नेताकार्यकर्तालाई सोध्दै बोल्ने प्रयास गरिरहनु भएको थियो । उम्मेदवार थापाले भोजपुरी मै “पेडमे ठप्पा लगावलजा, एकबार विजय करावलजा, केहु के शिर निजे होए नहि देव हम” भन्नु भएको छ ।
नवलपरासी क्षेत्र नं. २ नेकपा एमालेका उम्मेदवार लेखनाथ खरेलले बिहिवार रामग्राम नगरपालिकाको मुख्य बजारक्षेत्र वडा नं. ३ र वडा नं. ५ मा घरदैलो तथा मतदाता भेटघाट कार्यक्रम गर्नु भएको छ । रामग्राम ३ स्थित सम्पर्क कार्यालयबाट घरदैलो तथा भेटघाट गर्नु भएका उम्मेदवार खरेलले बुद्धचोक, घण्टाघर चोक, लोकतान्त्रीक चोकमा भएको कोण सभामा मतदातालाई ढुक्कभएर सूर्यचिन्हमा मतदान गर्न आग्रह गर्नुभयो ।
देश निर्माणको महान अभियानमा अग्रणी भूमिका खेलेको पार्टी नेकपा एमाले मात्र भएकोले संमृद्ध नेपाल निर्माणका लागि एमालेको सूर्य चुनाव छान्न उहाँले मतदातालाई आग्रह गर्नु भएको छ । उम्मेदवार खरेलले नेकपा एमाले सरकारमा हुँदा यसक्षेत्रको भौतिक पूर्वाधार विकासमा उल्लेखनीय काम गरेको बताउनु भयो । उम्मेदवार खरेलले रामग्राममा औद्योगिकरणको विकाससँगै प्रदुर्षण पनि बढ्दै गइरहेकोले त्यसको उचित व्यवस्थापनमा आफूले ध्यानदिने बताउनुभयो । उहाँले बुद्धको अष्टधातु रहेको स्थल रामग्राम, पण्डितपुरको विकासका लागि पहल गर्ने, कृषि र रोजगारीलाई प्राथमिकता दिदै युवाहरुलाई बैदेशिक रोजगारमा जानु पर्ने बाध्यताको अन्त्य गर्ने प्रतिवद्धता व्यक्त गर्नुभयो ।
.jpg)
राष्ट्रिय प्रजातन्त्र पार्टीका उम्मेदवार एवं पूर्वमन्त्री ध्रुवबहादुर प्रधान निर्वाचन क्षेत्र नं. २ का विभिन्न पालिका र वडाहरूमा घरदैलो तथा भेटघाट कार्यक्रमलाई तिब्रता दिइरहनु भएको छ । बिहिबार सरावलको वडा नं. १, २ र ३, पाल्हीनन्दन गाउँपालिकाको वडा नं. ५ र ६, सुनवल नगरपालिकाको वडा नं. १२ मा घरदैलो तथा मतदातालाई भेटघाट गरिएको राप्रपाले जनाएको छ । पार्टीका जिल्ला सचिव माधवलाल श्रेष्ठले फाल्गुन ९ गते राष्ट्रिय अध्यक्ष राजेन्द्र लिङ्देन नवलपरासी आउने र चुनावी सभालाई सम्बोधन गर्ने कार्यक्रम रहेको बताउनु भयो ।
नवलपरासी क्षेत्र नं. २ राष्ट्रिय स्वतन्त्र पार्टी (रास्वपा) का उम्मेदवार नरेन्द्रकुमार गुप्ताले बिहिवारदेखि सुनवल नगरपालिकाबाट घरदैलो तथा भेटघाट शुरुवात गर्नु भएको छ । उम्मेदवार गुप्ताले घरदैलो गर्दा जनतामा परिवर्तनको व्यापक चाहना रहेको पाए भन्नु भयो । रामग्राम नगरपालिकाका पूर्व मेयर समेत रहेका गुप्ताले जनताको साथ, समर्थन र उत्साहबाट सकारात्मक उर्जा प्राप्त भएको प्रतिकृया दिनुभयो । उम्मेदवार गुप्ताले मतदाताको प्रत्यक्ष सहभागिताबाट नीति निर्माण र यस क्षेत्रको समग्र विकास गर्ने प्रतिवद्धता ब्यक्त गर्नु भएको छ । उम्मेदवार, नेता कार्यकर्ताहरू घर भेटघाट होस् वा सार्वजनिक स्थानमा गरिएका कोणसभा नै किन नहुन सवै स्थानमा जय घण्टीको नारा लगाउँदै घण्टी बजाउने गरेका छन् ।
नेपाली कम्यूनिष्ट पार्टी नेकपाका उम्मेदवार देवेन्द्र पौडेलले पनि नवलपरासी क्षेत्र नं. २ मा चुनाव प्रचार प्रसारलाई तिब्रता दिइरहनुभएको छ । रामग्राम नगरपालिका वडा नं. ३ मा माघ १७ गते नै प्रचार प्रसार कार्यालय उद्दघाटन गर्दै उम्मेदवार पौडेलले आफू यस क्षेत्रको निर्वाचनमा जित्ने गरी आएको बताउनु भएको थियो । उम्मेदवार पौडेलले “सामदाम दण्डभेद सबै प्रयोग गरेर आफूले चुनाव जित्ने दावी गर्नुभयो ।” उम्मेदवार पौडेल दैनिक जसो निर्वाचन क्षेत्रका विभिन्न वडाहरुमा आफ्नो प्रतिवद्धता सहित घरदैलोमा जनभेटघाटमा रहनुभएको छ ।
जनता समाजवादी पार्टी नेपाल (जसपा)का उम्मेदवार देबेन्द्र यादव नवलपरासी क्षेत्र नं. २ मा चुनाव जित्ने रणनीतिका साथ प्रचार प्रसारमा देखिनु भएको छ । छाता चुनाव चिन्ह भएका यादवले चर्को घाम वा पानी नपरेको अवस्थामा पनि एउटा छाता प्रचार प्रसारमा प्रयोग गरिरहनु भएको छ । जसपाका उम्मदवार यादवले यसक्षेत्रलाई पर्यटकीय क्षेत्रको रुपमा विकास गर्नुपर्ने बताउनु भएको छ । यादवले रामग्राम स्तुपाको विकास गर्न सकेमात्र यसक्षेत्रको विकास हुनेकुरामा जोड दिनुभयो । उहाँले नवयुवा पुस्ताले परिवर्तनका लागि गरेको बलिदानको रक्षा गर्दै उनीहरूका माग सम्बोधन गर्ने प्रतिवद्धता व्यक्त गरेर चुनावमा प्रचार प्रसारमा रहेको जसपा नेपालले जनाएको छ ।
