परासी । आज विश्व उपभोक्ता अधिकार दिवस, प्रत्येक बर्ष मार्च १६ तारिखलाई विश्व उपभोक्ता अधिकार दिवसको रुपमा मनाउने गरिन्छ । नेपालमा पनि विभिन्न कार्यक्रमको आयोजना गरी दिवस मनाइने भएको छ ।
“विषयबस्तुको सुरक्षित उत्पादन, आत्मविश्वासी उपभोक्ता” भन्ने नारा तय भएको छ । जसले उत्पादन सुरक्षाको लागि महत्वपूर्ण आवश्यकता, खतरनाक बस्तुविरुद्ध बलियो नियमन र भौतिक र डिजिटल बजार दबैमा विश्वास निर्माणमा केन्द्रित छ । यस विषयले सुरक्षित उत्पादनले आत्मविश्वासी उपभोक्तालाई सृजना गर्ने कुरालाई प्राथमिकता दिएको हो ।
अमेरीकाका पूर्व राष्ट्रपति जोन एफ केनेडीले सन् १९६२ मार्च १५ मा सुरक्षा, सूचना, छनौट र सुनुवाईलाई उपभाक्ताको रुपमा घोषणा गरेसँगै विश्वभर मनाउने गरिएको छ ।
नवलपरासीमा दिवसको अवसरमा उपभोक्ता हित संरक्षण मञ्चको अगुवाईमा उपभोक्ताहरूबीच अन्तरक्रिया र २ जना सफल उद्यमीहरूलाई सम्मान गर्ने कार्यक्रम राखिएको मञ्चका अध्यक्ष भोजराज बाराकोटीले जानकारी दिनुभयो ।
दिवसको अवसरमा अध्यक्ष बाराकोटीले कुनै पनि बस्तु किन्दा त्यसको उत्पादन मिति र म्याद राम्रोसँग जाँच गर्ने, सामानको विल लिने, गुणस्तर र लेवल परिक्षण गर्ने, गलत र भ्रामक विज्ञापनबाट सचेत हुने, आफ्नो अधिकारका लागि सचेत रहने र समस्या परे जिल्ला प्रशासन कार्यालयमा उजुरी दिन आग्रह गर्नु भएको छ ।
