परासी । नेपाल रेडक्रस सोसाइटी जिल्ला शाखा नवलपरासीले बिहिवार नवलपरासी जिल्लाका नवनिर्वाचित प्रतिनिधि सभा सदस्यहरूलाई स्वागत सम्मान गरेको छ । नयाँ बर्ष २०८३ सालको अवसर पारेर रेडक्रस सोसाईटीले जिल्लाका दुबै निर्वाचन क्षेत्रका साँसदहरूलाई स्वागत गरेको हो ।
रेडक्रस सोसाईटी जिल्ला शाखाका सभापति राजेन्द्रप्रसाद अग्रहरीको अध्यक्षता र साँसद बिक्रम खनालको प्रमुख आतिथ्यमा स्वागत सम्मान गरिएको हो । सो अवसरमा बोल्दै प्रतिनिधि सभा सदस्य खनालले भन्नुभयो “जनताको काम भोलि होइन, आजै र आज गर्ने काम अहिलेनै गर्छु भन्ने प्रतिवद्धता गर्ने हो भने समस्याको ५० प्रतिशत समाधान तत्कालै हुन्छ ।” साँसद खनालले जिल्लाका सबै क्षेत्रका प्रतिनिधिहरूसँग एकैठाउँमा बसेर जिल्लाको समग्र विकासको योजना बनाउने प्रतिवद्धता व्यक्त गर्नुभएको छ । उहाँले प्रमुख जिल्ला अधिकारीमार्फत आफूले जिल्लाका सवै सरकारी कार्यालयका प्रमुखहरूसँग बसेर शुसासनका विषयमा कुरा गर्न चाहेको बताउनुभयो ।
कार्यक्रममा नवलपरासी क्षेत्र नं. २ का साँसद नरेन्द्रकुमार गुप्ताले जनताको अपेक्षा उच्चस्तरको रहेको बताउँदै, कानून निर्माण, बजेटको व्यवस्थापन गर्दै यो क्षेत्रको विकासमा काम गर्ने बताउनुभयो । साँसद गुप्ताले आफूले संसदमा पहिलो पटक बोल्दै गर्दा किसानको मुद्धा उठाएको बताउनु भयो । उहाँले किसानलाई आवश्यक पर्ने मलको व्यवस्था सरकारले ठीक समयमा गर्नुपर्ने भएकोले संसदमा मलको समस्या समाधान गर्न माग गरेको बताउनु भयो ।
कार्यक्रममा नवलपरासी जिल्लाका प्रमुख जिल्ला अधिकारी दिपकराज नेपाल भनसुनका आधारमा काम गर्ने प्रचलन तोडिएकोले नागरिकलाई आफै सेवा लिन आउन आग्रह गर्नुभयो । उहाँले अस्पष्ट र विकास निर्माणमा बाधक कानूनको संशोधन गर्न साँसदद्धयसँग अनुरोध गर्नुभयो ।
सो अवसरमा नेपाल रेडक्रस लुम्बिनी प्रदेशका कोषाध्यक्ष हैदर अलि मोमिन, नवलपरासी उद्योग वाणिज्य संघका अध्यक्ष ओमप्रकाश अग्रहरी, बरिष्ठ उपाध्यक्ष नगेन्द्र अग्रहरी, नेपाल रेडक्रस सोसाईटी जिल्ला शाखाका उपसभापती कृष्णप्रसाद लामिछाने, रेडक्रस सोसाईटी पाल्हीनन्दनका संयोजक गुड्डु गुप्ता, नागरिक समाजका अध्यक्ष बेचु गौंड लगायतले शुभकामना व्यक्त गर्नु भएको रेडक्रसका अर्जुनबहादुर क्षेत्रीले जानकारी दिनुभयो ।
कार्यक्रममा प्रतिनिधि सभा सदस्यद्वय खनाल र गुप्तालाई दोसल्ला र सम्मान पत्रले सम्मान गरिएको अध्यक्ष राजेन्द्र अग्रहरीले जानकारी दिनुभयो ।
