१९ बर्ष मुनिको लुम्बिनी प्रदेश स्तरीय महिला क्रिकेट प्रतियोगिताको उपाधि रूपन्देही जिल्लाले जितेको छ । आज सम्पन्न फाइनल खेलमा बाँकेलाई सहज रूपमा पराजित गर्दै रूपन्देही च्याम्पियन बनेको हो ।
टस जितेर पहिले ब्याटिङ रोजेको बाँकेले कमजोर प्रदर्शन गर्दै ८.३ ओभरमा सबै विकेट गुमाएर मात्र २० रन बनाउन सफल भयो । बाँकेले दिएको २१ रनको सामान्य लक्ष्य पछ्याएको रूपन्देहीले ५.१ ओभरमै २२ रन जोड्दै उपाधि माथि कब्जा जमायो हो ।
प्रतियोगिताको फाइनलमा उत्कृष्ट प्रदर्शन गरेकी रूपन्देहीकी आएशा भुसाल प्लेयर अफ द म्याच तथा प्लेयर अफ द टुर्नामेन्ट घोषित हुनुभएको छ । उहाँले नगद १० हजार सहित ट्रफी र प्रमाणपत्र प्राप्त गर्नुभएको हो ।
त्यसैगरी, प्रतियोगिताको इमर्जिङ प्लेयर नवलपरासीकी अनुष्का खत्री घोषित हुनुभयो । उहाँले नगद ५ हजार, ट्रफी तथा प्रमाणपत्र प्राप्त गर्नुभएको छ ।
प्रतियोगिताको समापन समारोह लुम्बिनी प्रदेशका युवा तथा खेलकुद मन्त्री सन्तोष पाण्डे को प्रमुख आतिथ्यता र विनय राजभण्डारीको अध्यक्षतामा सम्पन्न भएको हो । कार्यक्रममा प्रदेश सभा सदस्य एवं पूर्व मन्त्री खडक बस्नेत विशिष्ट अतिथिका रूपमा सहभागी हुनुभएको थियो ।
पानी परेका कारण खेल मैदानमा समापन कार्यक्रम गर्न नसकिएपछि पुरस्कार वितरण तथा समापन समारोह होटल एटलसमा गरिएको आयोजक नवलपरासी क्रिकेट संघका कोषाध्यक्ष लक्ष्मण सुवेदीले जानकारी दिनुभयो ।
छनौट प्रतियोगिता जेठ १२ गतेदेखि शुरुभएको हो । प्रतियोगितामा संघमा आवद्ध नवलपरासी, रुपन्देही, पाल्पा, कपिलबस्तु, दाङ, बर्दिया र बाँके जिल्ला सहभागी भएका थिए । ६ दिनसम्म सञ्चालित प्रतियोगिता सहिदस्मृती रङ्गशाला बडेरामा भएको हो ।
प्रतियोगिताले लुम्बिनी प्रदेशका महिला क्रिकेट खेलाडीहरूको प्रतिभा उजागर गर्न तथा प्रदेशस्तरीय क्रिकेट विकासमा महत्वपूर्ण योगदान पु¥याएको आयोजकले विश्वास गरेका छन् ।
