परासी । रामग्राम नगरपालिकाले सञ्चालन गरेको चौथो राष्ट्रपति रनिङ्ग शिल्ड प्रतियोगितामा अन्तर्गत तीन वटा खेल विद्याका ६ जना खेलाडि उत्कृष्ट भएका छन् । भलिवल, कबड्डी र एथेलेटिक्समा सहभागी २९४ जना खेलाडि मध्ये ६ जना खेलाडि उत्कृष्ट भएको नगरपालिकाले जनाएको छ । ६ खेलाडि मध्ये तीन जना छात्र र तीन जना छात्रा रहेका छन् ।
भलिवल खेल तर्फ जनता मा.बि डैनहवाका आशिक हरिजन उत्कृष्ट खेलाडि बन्नु भएको छ । यस्तै छात्रा तर्फ पवन माध्यमिक विद्यालयकी सन्ध्या चौधरी उत्कृष्ट महिला खेलाडि बन्नु भएको हो ।
यस्तै छात्र तर्फको कबड्डीमा रामग्राम एकेडेमीका अरुण हरिजन र छात्रा तर्फको कबड्डी खेलमा जनता मावि डैनहवाकी सपना राजभर उत्कृष्ट खेलाडि बन्नु भएको हो ।
प्रतियोतिमा एथेलेटिक्स तर्फ राष्ट्रिय माध्यमिक विद्यालय पंडितपुरका सन्दीप यादव छात्र तर्फ र सरस्वती माध्यमिक विद्यालय शान्तिचौरकी गुडियो डोम छात्रा तर्फ उत्कृष्ट खेलाडि घोषित हुनु भएको खेल संयोजक दयानन्दन चौधरीले जानकारी दिनुभयो ।
प्रतियोगितामा नगरपालिकाका २४ वटा सामुदायिक र संस्थागत विद्यालयहरुले सहभागिता जनाएका थिए । खेल माघ २१ देखि २३ सम्म रामग्राम १२ पचगाँवाको खेलमैदानमा गरिएको हो ।
प्रतियोगितामा राष्ट्रिय माध्यमिक विद्यालय पण्डितपुर प्रथम भएको छ । विद्यालयले समग्र खेलमा १० स्वर्ण, ५ रजत र २ कास्य पदक जित्दै उपाधी जितेको हो । यस्तै पवन माध्यमिक विद्यालय, परासीले ८ स्वर्ण, ७ रजत र ७ कास्य पदक जित्दै दोश्रो र सरस्वती माध्यमिक विद्यालय शान्तिचौर ४ स्वर्ण, ७ रजत र ४ कास्य सहित तृतीय भएको खेल संयोजक एवं सरस्वती माध्यमिक विद्यालयका प्रधानाध्यापक दयानन्द चौधरीले जानकारी दिनुभयो ।
