परासी । नवलपरासीमा सञ्चालित पोषण मार्फत जीवन रुपान्तरण परियोजनाको जिल्ला स्तरीय सरोकारावालाहरुसँगको समिक्षा र सामाजिक परिक्षण कार्यक्रम आज सम्पन्न भएको छ ।
जिल्ला समन्वय समिति नवलपरासीका प्रमुख एवं परियोजनाका सल्लाहाकार भगौतीप्रसाद यादव रुदलको अध्यक्षतामा कार्यक्रम गरिएको हो ।
कार्यक्रममा बेस नेपाल परासीका कार्यक्रम संयोजक शालिकराम पोख्रेलले जिल्लामा सञ्चालित परियोजनाको समिक्षात्मक प्रस्तुतीकरण गर्नु भएको हो । कार्यक्रम संयोजक पोख्रेलले नवलपरासी जिल्लामा २२ हजार ६३६ जनामा पोषण लेखाजोखा गर्ने लक्ष्य लिइएकोमा २२ हजार ६५४ जनामा लेखाजोखा गरिएको बताउनुभयो ।
बालबालिकाको पोषण लेखाजोखा गर्दा जिल्लामा १३ प्रतिशत बालकालिका कुपोषित देखिएको उहाँले बताउनुभयो । कार्यक्रममा संयोजक पोख्रेलले २ हजार ६९३ मा मध्यम शीघ्र कुपोषण अर्थात १२ प्रतिशत कुपोषण र २५० जनामा अति शीघ्र कुपोषण अर्थात १ प्रतिशत देखिएको जानकारी दिनुभयो ।
यस्तै कार्यक्रममा परियोजनाको सामाजिक परिक्षण ग्यालेक्सी सीप प्रशिक्षण केन्द्रका सञ्चालक एवं सामुदायिक रेडियो परासीका प्रवन्ध निर्देशक मेघराज गौतमले गर्नुभएको हो ।
कार्यक्रममा सरोकारवालाहरुले पोषण सुधारका लागि व्यवहार परिवर्तन महत्वपूर्ण पक्ष भएको बताएका छन् । कार्यक्रममा जिल्ला समन्वय समितिका प्रमुख यादवले कार्यक्रमलाई एकीकृत ढंगले अगाडि बढाउन पालिकाले योजना निर्माण गर्नु पर्ने बताउनुभयो ।
कार्यक्रममा बर्दघाट नगरपालिकाका नगरप्रमुख शम्भुलाल श्रेष्ठ, जिल्ला प्रशासन कार्यालयका सहायक प्रमुख जिल्ला अधिकारी पोषणराज भण्डारी, हेलेन केलर इन्टरनेशनल (एचकेआई) की प्राजेक्ट कोअडिनेटर भिमा पराजुली, बेस नेपालकी उपाध्यक्ष रोमकला राना, कार्यकारी निर्देशक शालिकराम पाण्डे, स्वास्थ्य कार्यालयका तथ्याङ्क अधिकृत यवदेव न्यौपाने लगायतले बालबालिकाको पोषण सुधारका लागि सरोकारवाला निकायसँगको समन्वय महत्वपूर्ण हुने बताउनु भएको छ ।
कार्यक्रममा जिल्लाका पालिका प्रमुखहरु, स्वास्थ्यकर्मी, सञ्चारकर्मी एवं वहुसरोकारवाला निकायका प्रतिनिधिहरुको उपस्थिति रहेको थियो ।
