परासी । एकीकृत हातेमालो समाज नेपाल (सियान)ले प्रतापपुर गाउँपालिकामा सञ्चालित परियोजनाको अनुगमन गरेको छ । गाउँपालिकाको वडा नं. ५ र ६ मा सञ्चालित पोषण मार्फत जीवन रुपान्तरण परियोजनाको कार्यक्रम प्रभावबारे अनुगमन गरिएको हो ।
सो क्रममा प्रतापपुर गाउँपालिका वडा नं. ५ को वडा कार्यालय र स्वास्थ्य चौकी भवनमा निर्माण गरिएको खानेपानी ट्याङ्कि र वडा नं. ५ कै गणेश मा.बि बसहियाको सामुदायिक विद्यालयमा निर्माण गरिएको सेफ्टी ट्याङ्किको अवलोकन गरिएको छ ।
यस्तै वडा नं. ६ मा कृषक राम विलास गुप्ताले सञ्चालन गर्नु भएको बब्लु एकीकृत कृषि फर्म र गड्यौला मल उत्पादन गर्दै गरेका कृषक रघुनन्दन गौंडको अवस्थाबारे अवलोकन गरिएको सियालले जनाएको हो ।
सियानले नवलपरासीका ४ गाउँपालिकाका ८ वटा वडाहरुमा पोषण मार्फत जीवन रुपान्तरण परियोजना विगत २ बर्षदेखि सञ्चालन गरिरहेको छ । सियानले नवलपरासीका पाल्हीनन्दन, सरावल, प्रतापपुर र सुस्ता गाउँपालिकामा परियोजना संचालन गरिरहेको छ ।
सो अवसरमा आयोजित परियोजना सल्लाहाकार समितिको बैठक गाउँपालिकाका अध्यक्ष उमेशचन्द्र यादवको अध्यक्षतामा बसेको छ । बैठकमा हालसम्म प्रतापपुर गाउँ पालिकामा गरेका गतिविधिबारे परियोजनाका तथ्याँक व्यवस्थापक अधिकृत मीन रानाले प्रस्तुतिकरण गर्नु भएको थियो ।
बैठकमा गाउँपालिकाकी उपाध्यक्ष मानकु्मारी चौधरी, परियोजनाका कृषि तथा पोषण सुपरभाइजर केदार घिमिरे, सफल कृषक बंसराज कोईरी लगायतले बोल्नु भएको सियानकी वास सहायक सुपरभाइजर सायदा निसा पठानले जानकारी दिनुभयो ।
परियोजनाले समूदायमा शिक्षा, स्वास्थ्य, विपद जोखिम न्यूनीकरण, जलवायु परिवर्तन, वातावरण, कृषि, खानेपानी तथा सरसफाई र बजारीकरणलाई प्राथमिकतामा राखेको जनाइएको छ ।
यस अवधिमा संस्थाले कृषि तथा खाद्य प्रणाली सुधारका १६ क्रियाकलाप, आपूर्ति श्रृखला र साना बजारसँग सम्बन्धित २ वटा, खानेपानी, सरसफाई तथा स्वच्छता सुधारका ६ क्रियाकलाप सञ्चालन गरिएको छ । परियोजना अन्तर्गतका विभिन्न गतिविधि सञ्चालन गर्दा ३० लाख १५ हजार १९५ रुपैया खर्च भएको परियोजनाका तथ्याँक अधिकृत रानाले जानकारी दिनुभयो ।
