परासी । सुनवल नगरपालिकाले आगामी आर्थिक वर्ष २०८३/८४ का लागि महिला सशक्तीकरण, उद्यमशीलता विकास र महिला मैत्री नगर निर्माणलाई उच्च प्राथमिकतामा राख्दै नीति तथा कार्यक्रम सार्वजनिक गरेको छ।
नगरपालिकाको १९औँ नगरसभामा नगर प्रमुख बिमला अर्यालले प्रस्तुत गर्नुभएको नीति तथा कार्यक्रममा महिला मैत्री नगर निर्माण अभियानलाई प्रभावकारी रूपमा अगाडि बढाउने उल्लेख गरिएको छ। विभिन्न राष्ट्रिय तथा अन्तर्राष्ट्रिय संघसंस्थाको सहकार्यमा आवश्यक सूचकहरू पूरा गर्दै महिला मैत्री नगरपालिका घोषणाको पूर्वाधार तयार पारिने नगरपालिकाले जनाएको छ।
महिला विरुद्ध हुने सबै प्रकारका हिंसा, शोषण, दुर्व्यवहार तथा भेदभाव अन्त्य गर्न केन्द्र र प्रदेश सरकारसँग समन्वय गरी आवश्यक कार्यक्रम सञ्चालन गरिने नीति तथा कार्यक्रममा उल्लेख छ। साथै महिलाहरूलाई उद्यम विकास, नेतृत्व विकास र सीप विकासमा सहभागी गराउँदै निजी क्षेत्रसँगको सहकार्यमा रोजगारी सिर्जना गर्ने कार्यक्रम सञ्चालन गरिने जनाइएको छ।
नगरपालिकाले ‘महिलासँग नगरप्रमुख’ कार्यक्रमलाई निरन्तरता दिँदै त्यसमार्फत महिलाहरूको आर्थिक विकास, पारिवारिक मेलमिलाप, शिक्षा तथा स्वास्थ्यसँग सम्बन्धित कार्यक्रम सञ्चालन गर्ने जनाएको छ। महिलाहरूको सरकारी सेवामा पहुँच बढाउन लोकसेवा आयोग तयारी कक्षा सञ्चालन गरिने व्यवस्था पनि गरिएको छ।
हिंसापीडित महिलाको तत्काल राहत, संरक्षण तथा पुनर्स्थापनाका लागि गैरसरकारी संस्थाको सहकार्यमा सेफ हाउस सेवा उपलब्ध गराइने तथा महिला हिंसा न्यूनीकरणका लागि परिवारमा मेलमिलाप, पुनःएकीकरण र आर्थिक सशक्तीकरणका कार्यक्रमलाई थप प्रभावकारी बनाइने नीति तथा कार्यक्रममा उल्लेख छ।
नगरपालिकाभित्र रहेका १३ वटा महिला उद्यम केन्द्रलाई अझ सशक्त र प्रभावकारी बनाउँदै महिलाको आर्थिक सशक्तीकरणलाई संस्थागत गर्ने लक्ष्यसहित कार्यक्रम अघि सारिएको नगर प्रमुख अर्यालले बताउनुभयो।
