परासी । पश्चिम नवलपरासीका सातै स्थानीय तहले आगामी आर्थिक वर्ष २०८३।०८४ का लागि नीति तथा कार्यक्रम तथा बजेट सार्वजनिक गरेका छन् । कानुनी व्यवस्थाअनुसार प्रत्येक स्थानीय तहले असार १० गतेभित्र आगामी आर्थिक वर्षको बजेट सार्वजनिक गर्नुपर्ने व्यवस्था रहेको छ ।
आगामी आर्थिक वर्षका लागि सार्वजनिक गरिएका नीति तथा कार्यक्रम तथा बजेटमा अधिकांश स्थानीय तहले पूर्वाधार विकास, सामाजिक विकास, शिक्षा, स्वास्थ्य तथा कृषि क्षेत्रलाई उच्च प्राथमिकतामा राखेका छन् । पाँचवर्षीय कार्यकालको अन्तिम वर्षमा रहेका पालिका प्रमुख तथा उपप्रमुखहरूले आफ्नो कार्यकालको अन्तिम बजेटसमेत प्रस्तुत गरेका हुन् ।
रामग्राम नगरपालिकाका नगरप्रमुख धनपत यादव, सुनवल नगरपालिकाकी नगरप्रमुख बिमला अर्याल, बर्दघाट नगरपालिकाका नगरप्रमुख शम्भुलाल श्रेष्ठ, पाल्हीनन्दन गाउँपालिकाका अध्यक्ष बैजुप्रसाद गुप्ता, सरावल गाउँपालिकाका अध्यक्ष सुखाडीप्रसाद चौधरी, प्रतापपुर गाउँपालिकाका अध्यक्ष उमेशचन्द्र यादव र सुस्ता गाउँपालिकाका अध्यक्ष टेकनारायण उपाध्यायले सम्बन्धित सभामार्फत नीति तथा कार्यक्रम सार्वजनिक गर्नु भएको हो ।
सातै स्थानीय तहले आगामी आर्थिक वर्षका लागि कुल ५ अर्ब २९ करोड ९९ लाख ४८ हजार रुपैयाँ बराबरको बजेट सार्वजनिक गरेका छन् ।
रामग्राम नगरपालिकाले १८ औँ नगरसभामार्फत नीति तथा कार्यक्रम तथा बजेट सार्वजनिक गरेको छ । नगरप्रमुख धनपत यादवले नीति तथा कार्यक्रम प्रस्तुत गर्नुभएको थियो भने नगर उपप्रमुख सम्झना चौधरीले आगामी आर्थिक वर्षका लागि ९४ करोड ५० लाख २१ हजार रुपैयाँको बजेट प्रस्तुत गर्नुभएको हो ।
बर्दघाट नगरपालिकाले आगामी आर्थिक वर्षका लागि ९२ करोड ९२ लाख रुपैयाँको बजेट सार्वजनिक गरेको छ । नगरपालिकाका उपप्रमुख रुद्रप्रकाश उपाध्यायले कुल बजेटमध्ये चालुतर्फ ६१ करोड ६३ लाख ५० हजार रुपैयाँ अर्थात् ६३ प्रतिशत र पुँजीगततर्फ ३१ करोड २८ लाख ५० हजार रुपैयाँ अर्थात् ३७ प्रतिशत विनियोजन गरिएको जानकारी दिनुभयो ।
सुस्ता गाउँपालिकाले आगामी आर्थिक वर्ष २०८३.०८४ का लागि ६० करोड ३२ लाख ७८ हजार रुपैयाँको बजेट सार्वजनिक गरेको छ । गाउँपालिकाकी उपाध्यक्ष गीता चौधरीले चालुतर्फ ३७ करोड ३१ लाख ७८ हजार रुपैयाँ तथा पुँजीगततर्फ २३ करोड ९९ हजार रुपैयाँ विनियोजन गरिएको जानकारी दिनुभयो ।
प्रतापपुर गाउँपालिकाले पनि आगामी आर्थिक वर्षका लागि ७७ करोड २२ लाख ९९ हजार रुपैयाँको बजेट सार्वजनिक गरेको छ । गाउँपालिकाकी उपाध्यक्ष मानकुमारी चौधरीले प्रस्तुत गरेको बजेटमा चालुतर्फ ६८ प्रतिशत र पुँजीगततर्फ ३२ प्रतिशत रकम विनियोजन गरिएको छ ।
पाल्हीनन्दन गाउँपालिकाले जिल्लामै सबैभन्दा पहिले नीति तथा कार्यक्रम र बजेट सार्वजनिक गरेको थियो । गाउँपालिकाले आगामी आर्थिक वर्षका लागि ५१ करोड २५ लाख रुपैयाँको बजेट ल्याएको छ । यसमध्ये चालुतर्फ ३२ करोड २५ लाख रुपैयाँ र पुँजीगततर्फ १८ करोड ८६ लाख ३० हजार रुपैयाँ विनियोजन गरिएको छ ।
बजेटमा वित्तीय समानीकरण अनुदानतर्फ ११ करोड २४ लाख रुपैयाँ, सशर्त अनुदानतर्फ २१ करोड ६ लाख रुपैयाँ, समपूरक अनुदानतर्फ ३० लाख १५ हजार रुपैयाँ, राजस्व बाँडफाँडतर्फ ९ करोड ८ लाख रुपैयाँ तथा प्रदेश सरकारबाट प्राप्त वित्तीय अनुदानतर्फ ७८ लाख ९० हजार रुपैयाँ समावेश गरिएको गाउँपालिकाले जनाएको छ ।
सुनवल नगरपालिकाले आगामी आर्थिक वर्षका लागि १ अर्ब २३ लाख ५० हजार रुपैयाँको बजेट सार्वजनिक गरेको छ । उपप्रमुख सूर्य दुबेले बजेटमा आन्तरिक स्रोतबाट २४ करोड ९३ लाख ५३ हजार रुपैयाँ, अन्तरसरकारी वित्तीय हस्तान्तरणबाट ५० करोड ९० लाख ४२ हजार रुपैयाँ, संघ तथा प्रदेश सरकारको राजस्व बाँडफाँडबाट १६ करोड ३९ लाख ५५ हजार रुपैयाँ तथा मौज्दात रकमबाट ८ करोड रुपैयाँ प्राप्त हुने प्रक्षेपण गरिएको बताउनु भयो ।
यस्तै, सरावल गाउँपालिकाले आगामी आर्थिक वर्षका लागि ५३ करोड ५३ लाख रुपैयाँको बजेट सार्वजनिक गरेको छ । गाउँपालिकाले चालुतर्फ ३२ करोड ९९ लाख ६४ हजार रुपैयाँ र पुँजीगततर्फ २० करोड ५४ लाख ३१ हजार रुपैयाँ विनियोजन गरेको छ । बजेटमा आर्थिक विकासतर्फ २ करोड १५ लाख ४७ हजार रुपैयाँ, सामाजिक विकासतर्फ २४ करोड २२ लाख ५८ हजार रुपैयाँ, प्रविधिमैत्री शिक्षा कार्यक्रम सञ्चालनका लागि १ करोड रुपैयाँ तथा पूर्वाधार विकासतर्फ १४ करोड ६५ लाख रुपैयाँ विनियोजन गरिएको गाउँपालिकाकी उपाध्यक्ष बासमती हरिजनले जानकारी दिनुभयो ।
