परासी । नवलपरासीको सरावल गाउँपालिकालाई पूर्ण संस्थागत प्रसूति सेवायुक्त पालिका घोषणा गरिएको छ। गाउँपालिकाभित्र शतप्रतिशत प्रसूति स्वास्थ्य संस्थामै हुने सुनिश्चिततासहित आवश्यक सूचकहरू पूरा भएपछि पालिकालाई औपचारिक रूपमा पूर्ण संस्थागत प्रसूति सेवायुक्त घोषणा गरिएको हो ।
गाउँपालिकाभित्र रहेका ५६ वटै टोलमा २०८२ साल वैशाखदेखि चैत मसान्तसम्म ५८८ जना गर्भवती महिलाले स्वास्थ्य सेवा प्रोटोकलअनुसार चार पटक गर्भजाँच गराएका छन् भने तीन पटक प्रसूति जाँच गराएका छन्। यस अवधिमा गर्भजाँच गराउनेको दर ९७.६१ प्रतिशत तथा प्रसूति जाँच गराउनेको दर ९८.२९ प्रतिशत रहेको गाउँपालिकाले जनाएको छ।
गाउँपालिकाका अध्यक्ष सुखाडी प्रसाद चौधरीका अनुसार गत जेठ १८ गते बसेको स्थानीय प्रजनन स्वास्थ्य समन्वय समितिको बैठकले सबै वडालाई पूर्ण संस्थागत प्रसूति सेवायुक्त वडा घोषणा गरी दिगोपना सुनिश्चित गरेको थियो। त्यसपछि असार ३ गते जिल्ला तहबाट भेरिफिकेसन सम्पन्न भई घोषणा गर्न अनुमति प्राप्त भएपछि आज गाउँपालिकालाई पूर्ण संस्थागत प्रसूति सेवायुक्त पालिका घोषणा गरिएको हो।
घोषणा समारोहमा स्वास्थ्य क्षेत्रमा उल्लेखनीय योगदान पु¥याउने स्वास्थ्यकर्मी, महिला स्वास्थ्य स्वयंसेविका तथा अन्य सरोकारवालाहरूलाई दोसल्ला र प्रमाणपत्र प्रदान गरी सम्मान गरिएको छ ।
सरावल गाउँपालिका अन्तर्गत रहेका सातवटै स्वास्थ्य संस्थाबाट आमा तथा नवजात शिशुलाई सुरक्षित, गुणस्तरीय र सम्मानजनक मातृ सेवा उपलब्ध गराइँदै आएको छ। साथै मनरी स्वास्थ्य चौकी (सरावल–२) र भुजहवा स्वास्थ्य चौकी (सरावल–७) बाट नियमित रूपमा २४सै घण्टा प्रसूति सेवा सञ्चालन भइरहेको छ।
नेपालको संविधान २०७२ ले प्रत्येक नागरिकलाई निःशुल्क आधारभूत स्वास्थ्य सेवा प्राप्त गर्ने मौलिक अधिकार सुनिश्चित गरेको छ। सोही व्यवस्था तथा जनस्वास्थ्य सेवा ऐन, २०७५ अनुसार स्थानीय तहका बर्थिङ सेन्टर तथा अस्पतालहरूबाट संस्थागत प्रसूति सेवा निःशुल्क उपलब्ध गराइँदै आएको छ।
घोषणा कार्यक्रम गाउँपालिकाका अध्यक्ष सुखाडीप्रसाद चौधरीको अध्यक्षता र जिल्ला समन्वय समितिका प्रमुख भगौती यादवको प्रमुख आतिथ्यमा सम्पन्न भएको हो ।
कार्यक्रममा गाउँपालिकाकी उपाध्यक्ष बासमती हरिजन, स्वास्थ्य कार्यालय नवलपरासीका प्रमुख अङ्गदबहादुर शाही, स्वास्थ्य शाखा प्रमुख ओमनारायण देवकोटा, फेयरमेड नेपालका तुलसी खनाल, स्वास्थ्य संस्थाका इन्चार्ज अशोककुमार पाण्डे, नर्सिङ स्वास्थ्यकर्मी अस्मिता चौधरी, महिला स्वास्थ्य स्वयंसेविका सीता शर्मा, स्टाफ नर्स मनिषा अग्रहरीलगायतले शुभकामना मन्तव्य व्यक्त गर्नुभएको कार्यक्रमसञ्चालन नीलकण्ठ भण्डारीले जानकारी दिनुभयो ।
(सामुदायिक रेडियो परासी)
