पुष १० गते माओवादी केन्द्रका अध्यक्ष दाहाललाई प्रधानमन्त्री बनाउन समर्थन गरेर सरकारमा सहभागी भएका एमाले र राप्रपा बाहिरिएपछि नयाँ सत्ता समीकरण सुरु भएको छ । एमाले ७८ र राप्रपाका १४ सांसदको समर्थन हटेपछि आठ दलीय गठबन्धनभित्रका दलहरुले सत्ता समीकरणका लागि आन्तरिक छलफल अघि बढाएका छन् । आठ दलीय गठबन्धनको मुख्य घटक नेपाली कांग्रेसले अहिले राष्ट्रपति निर्वाचनमा केन्द्रीत भएकाले राजनीतिक परिवेशको आधारमा सत्ता समीकरणलाई अघि बढाउने तयारी भएको बताएको छ ।
त्यस्तै, अघिल्लो गठबन्धनमा सहभागी भएपनि सरकारमा नगएको जनता समाजवादी पार्टी अब सत्ता समीकरणका लागि प्रधानमन्त्री दाहालको कदमको प्रतिक्षामा छ । एमालेले सरकारलाई दिएको समर्थन फिर्ता लिदै सरकारबाट बाहिरिएपछि सरकारले पुर्णता लिन खोजेमा आफूहरुको सहयोग हुने सो पार्टीका उपाध्यक्ष अशोक राईले बताउनु भयो ।
राष्ट्रपतिमा साझा उम्मेदवार खडा गर्न मध्यमार्गी भूमिका खेलेको अर्को मुख्य घटक एकिकृत समाजवादीले तत्काललाई पार्टीमा कुनै छलफल नभएपनि राजनीतिक परिस्थीति फेरिएकाले सरकारमा सहभागी हुने सम्भावना बढेको बताएको छ । सो पार्टीका नेता किसान श्रेष्ठ एमाले सरकारबाट बाहिरिएसंगै प्रधानमन्त्री एक्लैले सरकार सञ्चालन गर्न कठिन हुने भन्दै छलफल शुरु हुने बताए ।
आठ दलीय गठबन्धनमा सहभागी अर्को दल लोकतान्त्रीक समाजवादी पार्टीले सरकारमा सहभागी हुने मनसाय बनाएको छ । सो पार्टीका नेता सर्वेन्दनाथ शुक्लले सरकारमा जाने विषयमा यसअघि नै निर्णय भइसकेकाले कुन मन्त्रालय र कस्तो पोजिशनमा सहभागि हुने भन्नेबारेमा छिट्टै निर्णय गर्ने बताउनु भयो ।
यसअघिको सात दलीय गठबन्धनमा भएपनि सरकारमा नगएको नागरिक उन्मुक्ती पार्टी राष्ट्रपति निर्वाचनसम्म आइपुग्दा आठ दलको साझेदारीमा सहभागि भएको छ । राजनीतिमा आएको परिवर्तन संगै अब बन्ने नयाँ सत्ता समीकरणमा पनि आफ्नो मागमा अडिक रहेको सो पार्टी तत्काल सरकारमा नजाने अडान राखेको छ ।
राष्ट्रपति निर्वाचनका लागि एकै ठाउँमा उभिएका आठ दलमध्ये कांग्रेसको ८८, माओवादी केन्द्रको ३२, जनता समाजवादी पार्टी जसपाको १२, एकिकृत समाजवादी पार्टीको १०, जनमत पार्टीको ६, लोकतान्त्रीक समाजवादी लोसपाको ४, नागरिक उन्मुक्ती पार्टीको ४ र राष्ट्रीय जनमोर्चाको १ सिट छ । त्यसैले प्रधानमन्त्री दाहालले विश्वासको मत लिंदा उनीहरुको समर्थन प्राप्त भएमा १ सय ५७ मतसहित सरकारले निरन्तरता पाउने देखिएको छ । त्यसमाथि १९ सिट भएको राष्ट्रिय स्वतन्त्र पार्टीले समर्थन समेत कायमै छ ।
#radiokantipur
