११३ औं अन्तराष्ट्रिय महिला दिवसको अवसरमा पाल्हीनन्दन गाउँपालिकाका महिलाहरुले निर्वाचित जनप्रतिनिधिसँग अन्तक्रिया गरेका छन् । पालिकाका ६ वटै वडाबाट उपस्थित भएका सयौ महिलाहरुले आफ्ना जनप्रतिनिधिसंग आफूले पाउने हक अधिकार र सेवा सुविधाबारे प्रश्न उठाएका थिए । कार्यक्रममा सहभागी महिलाहरुले पालिकाबाट पाउने सेवामा समान पहुँच हुनु पर्ने, शान्ति स्थापनाकालागि मेलमिलाप कार्यक्रमलाई प्रभावकारी वनाउनु पर्ने, वडा र पालिकाबाट सम्पादन हुने कार्यक्रमको सूचना सवैले समानरुपले प्राप्त गर्ने वातावरण तयार पार्न लगायतका सुझाव दिएका थिए ।
अन्तराष्ट्रिय श्रमिक महिला दिवसको अवसर पारेर सोमबार जनप्रतिनिधिसँग महिला र महिलाहरुद्धारा उत्पादित हस्तकलाका सामाग्री प्रदर्शन कार्यक्रमको आयोजना गरिएको थियो । सुनवल सामुदायिक विकास केन्द्रका अध्यक्ष सपना अधिकारी थापाको अध्यक्षता र पाल्हीनन्दन गाउँपालिकाका अध्यक्ष बैजु प्रसाद गुप्ता दिपकको प्रमुख आतिथ्यमा कार्यक्रम गरिएको हो ।
कार्यक्रममा पालिका भित्रका १७ वटा महिला समूहले तयार पारेका हस्तकलाका सामाग्री प्रदर्शनमा राखिएको थियो । प्रदर्शनीमा राखिएका सामाग्री अवलोकन गर्दै गाउँपालिकाका अध्यक्ष गुप्ताले महिलाहरुको सीपको प्रसंसा गर्दै आगामी दिनमा काशेली घरमार्फत उत्पादित सामाग्रीको बजारीकरणमा सहयोग गर्ने प्रतिवद्धता ब्यक्त गर्नु भएको छ ।
कार्यक्रममा गाउँपालिकाका उपाध्यक्ष सकिना फातुमा अन्सारी, वडा नं. २, ३, ४ र ५ का अध्यक्ष क्रमशः जगदिश प्रसाद गुप्ता, गोधन प्रसाद हरिजन, रविन्द्र कुमार साहानी, दिनेश चन्द्र त्रिपाठीले महिला दिवसको अवसरमा चर्चा गर्नु भएको थियो । यस्तै पाल्हीनन्दन गाउँपालिका गाउँकार्यकालिका सदस्य अनामिका हरिजन, सदस्य अनिता साहानी लगायतले शुभकामना व्यक्त गर्नु भएको छ ।
कार्यक्रम पाल्हीनन्दन गाउँपालिका स्तरीय वहुसरोकारवाला फोरमको आयोजना, पाल्हीनन्दन गाउँपालिकाको समन्वय र सहयकार्य तथा युनाइटेड मिसन टु नेपाल, एविसी नेपाल, आफन्त नेपाल, माइति नेपाल, सामुदायिक रेडियो परासी ९०.२ मेगाहर्ज जस्ता संस्थाले सहकार्य गरेको सुनवल सामुदायिक विकास केन्द्रका सामाजिक परिचालन अशोक गुप्ताले जानकारी दिनु भयो ।
https://youtu.be/Ed11UdY8T6o
