नवलपरासीको सरावल गाउँपालिकाको विकास निर्माण र सेवा प्रवाह सम्बन्धी सार्वजनिक सुनुवाइ शुक्रबार सम्पन्न भएको छ । सरावल गाउँपालिकाले यस अघि ७ वटै वडाहरुमा पुगेर सार्वजनिक सुनुवाइ कार्यक्रम गरेको थियो । शुक्रवार पालिका स्तरीय सार्वजनिक सुनुवाई गरेको हो ।
सरावल गाउँपालिका अध्यक्ष सुखाडिप्रसाद चौधरीको अध्यक्षतामामा कार्यक्रम गरिएको हो । कार्यक्रममा गाउँपालिकाका उपाध्यक्ष बासमती हरिजन, प्रमुख प्रशासकीय अधिकृत दुर्गा पौडेल र सात वटै वडाका वडाअध्यक्षहरुको उपस्थिति रहेको थियो ।
सार्वजनिक कार्यक्रमको प्रारम्भमै प्रमुख प्रशासकीय अधिकृत पौडेलले चालु आ.ब.को ७ महिनामा भए गरेका कार्यप्रगतिबारेको प्रतिवेदन प्रस्तुत गर्नु भएको थियो । सोहि प्रतिवेदनका आधारमा उपस्थित गाउँपालिकावासीले प्रश्न गरेका थिए । दर्जनौ गाउँवासीले विकास निर्माण र सेवा प्रवाहको बारेमा प्रश्न गर्दै पालिकाले गुणस्तरीय र प्राविधिक शिक्षामा जोड दिन, वर्थिङ्ग सेन्टरलाई थप प्रभावकारी बनाउन, कृषिमा सिंचाई, बिउबिजन र प्रविधिमा अनुदानको व्यवस्था गर्न माग गरेका छन् । बर्षौदेखिको डुवानको समस्या समाधानकालागि पालिकाले उपल्ला सरकारी निकायमा पहल गर्न पनि आग्रह गरेका छन् । यस्तै खानेपानीको उचित व्यवस्थापन, वडा वडामा खेल मैदान र नयाँ खेलाडि उत्पादनका साथै पालिका भित्रका मूलसडक र कृषि सडकलाई प्राथमिकता दिएर निर्माण गर्न माग गरिएको छ ।
यस्तै नागरिकले सेवा प्रवाहलाई चुस्त, प्रविधियुक्त र नागरिकमैत्री बनाउनु पर्नेमा जोड दिएका छन् । कार्यालय समयको ख्याल गर्न, खाजा खाने समयदेखि अनुगमन, मूल्याँङ्कनका कामलाई पनि प्रभावकारी बनाउन सुझाव दिएका थिए ।
कार्यक्रममा नागरिकबाट प्राप्त सुझावलाई ग्रहण गर्दै आगामी दिनमा पालिकाको विकास निर्माण र कर्मचारीद्धारा गरिने सेवा प्रवाहलाई गुनासो रहित वनाउन अध्यक्ष चौधरीले प्रतिवद्धता व्यक्त गर्नु भएको छ । यसैक्रममा न्यायीक समितिको बैद्यानिकता र समितिले गर्ने कामको प्रभावका बारेमा उपाध्यक्ष हरिजनले चर्चा भएको थियो ।
कार्यक्रममा नागरिकहरुले वडा अध्यक्षहरुको भूमिकाका विषयमा पनि प्रश्न उठाएका छन् । चुनावका बेला गरिएका प्रतिवद्धताहरु पुरा गर्ने समय आएकोले एक पटक चुनावी घोषण पत्र हेर्न र सोही बमोजिम काम गर्न नागरिकहरुले सुझाव दिएका थिए ।
सातवटै वडा र गाउँपालिका स्तरीय सार्वजनिक सुनुवाई कार्यक्रमको संचालन तथा सहजिकरण सामुदायिक रेडियो परासी ९०.२ मेगाहर्जले गरेको स्टेशन म्यानेजर विकास अधिकारीले जानकारी दिनु भएको छ । संचालिन सवै सार्वजनिक सुनुवाई कार्यक्रमको प्रत्यक्ष प्रसारण नेपाली चेलीको अफिसियल फेसबुकबाट पनि गरिएको थियो ।
