भनिन्छ आँट र कर्म राम्रो छ भने जुनसुकै सफलताको शिखरमा पुग्न सकिन्छ । ठूलाठूला बिकास भएको शहरमा मात्र सफलता हैन एउटा सामान्य गाउँठाउँबाट सामान्य व्यक्तिले पनि प्रगति गर्न सक्छ । संस्था संचालन गर्दा व्यक्तिलाई नहेरी सिंगो संस्थालाई हेर्नु पर्ने मान्यता हुन्छ । समय सापेक्ष नेतृत्व लोकतान्त्रिक पद्धति अनुसार फेरीएको हुन्छ ।
संस्था जुन क्षेत्रमा जुन उद्देश्यकोलागि गठन भएको हुन्छ त्यस क्षेत्रमा आफ्नो प्रभाव पारेको हुन्छ । सानो लगानी र ठुलो सोंचको प्रतिफल हो महिला जागरण बहुउदेश्यीय सहकारी संस्था लि. मनरी । एउटा बिकट क्षेत्रमा रहेको संस्था जहाँ विपन्न, आदिवासी जनजाती ,मधेशी, मुस्लिम तथा दलितहरुको बस्ती छ । आर्थिक, सामाजिक, शैक्षिक, साँस्कृतिक रुपले पछाडि परेको वर्गको बसोबास छ भने विकास स्वभाविक रुपमा सुस्त गतिले हिडेको हुन्छ तर त्यही समुदायको स्थानिय महिलाहरुको अर्थक प्रयासबाट संस्थाको स्थापना र विकास एउटा ज्वलन्त उदाहरण बनेको छ ।
२५ जना महिला मिलि सुरुवात गरेका सामान्य बचतबाट एउटा उत्कृष्ट सहकारी बन्न सफल भएको सहकारी संस्था हो, महिला जागरण बहुउदेश्यीय सहकारी संस्था लि. । महिलाद्धारा महिलाकालागि संचालित संस्थाले २७ औँ वर्ष पुरा गरिसकेको छ ।
छरिएर रहेको पुँजीलाई एकत्रित गरी ग्रामीण क्षेत्रका महिलाहरुलाई संगठित गरी स—साना खाँचो र आर्थिक समस्यालाई पुरा गर्ने र सामाजिक रुपले पिछडिएका महिलाहरुको सशक्तिकरण र विकासगर्ने उद्देश्यका साथ सुरुवात गरिएको थियो । सरावल गाउँपालिका वडा नं. २ स्थित मनरीमा संस्था रहेको छ । हाल कार्य समितिमा ११ जना सदस्य रहेका छन् ।
२०५१।०५२ तिर सामान्य एउटा झुपडिमा बसेको बैठकको छलफलबाट संस्थाको बिजारोपण भएको हो । संस्था गठनका बेला संस्थापक अध्यक्षको रुपमा मतरानिदेवि चौधरी रहनु भएको थियो । उहाँको अध्यक्षतामा ९ सदस्यीय कार्यसमिति गठन गरिएको थियो । समिति गठनसँगै २५ जना महिलाहरुले मासिक रुपमा १० रुपैया बचत गर्ने निर्णय गरे । केहि महिनापछि संस्थाको स्थापना तत्कालिन महिला विकास कार्यालय तथा महिला जागरण दृष्य केन्द्र कार्यक्रमको सहयोग र समन्वयबाट विं.स. २०५२ सालमा महिला समुहले पूर्णता पाएको हो । त्यसपछि वि.स. २०५६ साल चैत्र २० गते प्रथम ऐतिहासिक भेला सम्पन्न भयो । भेलाबाट तत्कालिन मनरी गा.वि.स वडा नं. ५ तिलौलिको बगैचामा मतरानीदेवि चौधरीको अध्यक्षतामा पुनः ९ सदस्यीय समिति गठन गरियो ।
त्यसपछि संस्थाको विनियम निर्माण गरी ६ महिना भित्र अर्थात २०५७ साल भदौ ४ गते तत्कालिन डिभिजन सहकारी कार्यालय नवलपरासीमा दर्तागरी प्रथम एतिहासिक साधारण सभा र अधिवेशन जनता मा.वि. मनरीको प्राङ्गणमा २०५७ साल असोज १५ गते सम्पन्न भयो । त्यहि अधिवेशनले रमा सिंह थारुलाई सर्वसम्मत अध्यक्ष चयन गर्यो । अध्यक्ष थारुकै घरबाट औपचारिक रुपमा कार्यालय नै स्थापना गरी संस्थाको दैनिक कामकाजको शुरुवात गरियो ।
२०५७ साल माघ ११ गते तत्कालिन मनरी गा.वि.सले संस्थाको कार्यालय संचालनकालागि एउटा कोठा उपलब्ध गराएको थियो । संस्थाले आफ्नो यात्रा एउटा शेयर सदस्यको घरबाट सुरु गरी २५ जना सेयर सदस्य रहने गरि ५००० हजार शेयरपूँजी र १० रुपैयाँ बचतबाट सुरुवात भएको संस्था हाल १२२७ जना शेयर सदस्यहरुको शेयरपूँजी २३ औँ साधारण सभासम्म आइपुग्दा १ करोड ३१ लाख ९५ हजार ५ सय पुगेको छ । भने कुल बचत ५ करोड ४४ लाख २ हजार ३ सय २२ रुपैया पुगेको छ ।
संस्थाले विस्तारै कार्यक्षेत्र र सदस्य सँख्याको बृद्धि गर्दै जाँदा काम गर्न कठीन भएपछि तत्कालिन मनरी गाउँ विकास समितिका अध्यक्ष जनार्दनप्रसाद थारुको पहलमा ७ धुर जग्गा उपलब्ध भयो । सोहि जग्गामा भवन निर्माणको लागि विभिन्न व्यक्तिहरुको साथ र सहयोग प्राप्त भएको थियो । जसमा सरावल गाउँपालिका वडा नं. २ जावा बस्ने स्वर्गीय रुद्रनारायण थारु, जमुनिया निवासी बागेश्वर चौधरी, पटनी निवासी नारायण थारु तथा तत्कालिन सांसद देवेन्द्रराज कण्डेल लगाएतको सहयोगबाट २ कोठे भवनको तत्कालिन सांसद खेमनारायण फौदजारबाट सिलान्यास भएको थियो । संस्थाको संस्थागत विकासमा तत्कालिन साँसद बैजनाथ चौधरीको पनि सहयोग रहेको थियो । अहिले संस्थाले सुविधा सम्पन्न भवनबाट सेवा प्रवाह गरिरहेको छ ।
हाल संस्थामा १ हजार २ सय २७ जना शेयर सदस्य रहेका छन । संस्थाले आफ्ना शेयर सदस्यहरु सेवा प्रवाहकालागि बार्षिक रुपमा विभिन्न योजनाहरु ल्याउने गरेको छ । विशेष गरी सदस्यहरु कृषि क्षेत्रमा आवद्ध भएका कारण सदस्यहरुलाई विउ विजन मल खादको व्यवस्था गरेको छ । यस्तै ग्यास तथा रेमिटान्स, आइयमि सेवा सुबिधा दिइरहेको छ । महिलाहरुको बिकासको लागि विभिन्न व्यवसायिकमुलक तालिमहरु पनि प्रदान गरिरहेको छ ।
