रामग्राम नगरपालिका भित्रका विभिन्न विषयगत सहकारीको अवस्था विषयक अन्तरक्रिया कार्यक्रम बुधवार परासीमा सम्पन्न भएको छ । रामग्रामका ३३ वटा सहकारीहरुका अध्यक्ष र व्यवस्थापकहरुको उपस्थितिमा सहकारीे अन्तक्रिया कार्यक्रम गरिएको हो । पछिल्लो समय नगरपालिकाले सहकारीहरुको अनुगमन, मूल्याङ्कन र नियमनमा जोड दिंदै आएको छ ।
रामग्राम नगरपालिकाका आर्थिक विकास शाखा प्रमुख रामशुवास गुप्ताको अध्यक्षता र नगरपालिकाका उपप्रमुख संझना चौधरीको प्रमुख आतिथ्यमा कार्यक्रम गरिएको हो । सो अवसरमा उपप्रमुख चौधरीले नगरभित्रका सहकारीहरु सहकारी सिद्धान्त, मूल्य मान्यता अनुसार परिचालित हुनुपर्नेमा जोड दिनु भयो ।
कार्यक्रममा आर्थिक विकास शाखा एवं सहकारी फोकल पर्सन गुप्ताले रामग्रामका सहकारीहरुको अवस्था, सहकारीमा देखिएका समस्या, चुनौती र समाधानका विषयमा प्रस्तुतिकरण गर्नु भएको थियो ।
यस्तै कृषि शाखाका उमेशकुमार धोवीले नगरपालिकाले कृषि क्षेत्रमा गरेका काम, कृषी, मलखादको संकलन र वितरणबारे जानकारी गराउनु भएको छ । उहाँका अनुसार रामग्राम नगरपालिका भित्रका १४ वटा सहकारी मार्फत विउ तथा मलखाद वितरण गर्दै आइरहेका छन् ।
अन्तरक्रिया कार्यक्रममा सहकारीका अध्यक्ष एवं व्यवस्थापकहरुले सहकारीको अवस्थाबारे चर्चा गरेका थिए । सहकारीहरुले आफ्नो लगानी उत्पादनशिल क्षेत्रमा गर्न नसकेको स्वीकार गरेका छन् । रामग्राम नगरपालिकामा वहुउद्देश्यीय सहकारी संस्था ७, बचत तथा ऋण सहकारी संस्था १३, महिलाहरुद्धारा संचालित सहकारी ३, साना किसान सहकारी ९, सूचना तथा संचार सहकारी संस्था १ वटा रहेका छन् भने प्रदेश र संघ कार्यक्षेत्र भएका सहकारीहरु पनि रामग्राममा रहेको शाखा प्रमुख गुप्ताले बताउनु भयो ।
