नेपाल पत्रकार महासंघ नवलपरासीले सदस्यता शुद्धिकरण अभियान शुरु गरेको छ । शुद्धिकरण अभियानको शुरुवातमै पाँच जना सदस्यहरुले सदस्यता त्यागको स्वघोषणा गरेका छन् ।
नेपाल पत्रकार महासंघ केन्द्रीय समितिले सदस्यता शुद्धिकरण अभियान सञ्चालन गरेपछि सक्रिय नभएका सदस्यहरुले स्वतस्र्फुत सदस्यता त्याग गर्न थालेका हुन् । पत्रकारिता क्षेत्रमा क्रियाशिल नभएका र अन्य पेशालाई मुल पेशा बनाएका सदस्यहरुलाई सदस्यता त्यागको स्वघोषणा गरी संस्था शुद्धिकरणमा सहयोगी बन्न आह्वान गरेअनुसार पाँचजना सदस्यहरुले सदस्यता त्याग गरेको घोषणा गरेको नेपाल पत्रकार महासंघ नवलपरासी शाखाका अध्यक्ष हरि शर्माले बताउनुभयो ।
सदस्यता त्यागको स्वघोषणा गर्नेमा पूर्वसभापति रामप्रसाद पाण्डे, पूर्वजिल्ला सचिव सञ्जय कर्ण, पूर्वकार्यसमिति सदस्य ताराचन्द्र बर्मा, उर्मिला वानिया र सुनयना चौधरी रहनु भएको छ ।
त्यसरी सदस्यता त्यागको स्वघोषणा गर्ने सदस्यले विगतमा महासंघ र जिल्लाको पत्रकारिता क्षेत्रमा पुर्याएको योगदान हेरेर जिल्ला शाखाले उहाँहरुलाई मानार्थ सदस्यका रुपमा केन्द्रमा सिफारिस गर्न सकिने समेत संस्था शुद्धिकरण मापदण्ड निर्देशिकामा उल्लेख छ । जिल्लामा हाल ८६ जना सदस्य छन् । पत्रकारिताभन्दा अन्य पेशालाई मुल पेशा बनाएका र निष्कृय रहेका केही सदस्यहरुले पनि आफूहरुले संस्था शुद्धिकरणका लागि सदस्यता त्यागको स्वघोषणा गर्ने जनाएको अध्यक्ष शर्माले बताउनुभयो ।
महासंघले जारी गरेको संस्था शुद्धिकरण मापदण्ड निर्देशिकामा जनप्रतिनिधि, निजामती तथा अन्य जुन सुकै सरकारी निकायको स्थायी, अस्थायी, करार सेवामा कार्यरत (मिडियासँग सम्बन्धित सरकारी र संस्थान बाहेक) तथा गैरसरकारी संस्था (सहकारी, बैंक, फाइनान्स लगायत अन्य संघ संस्था) मा पूर्णकालीन काम गर्नेको सदस्यता नवीकरण नहुने र नयाँ सदस्यता पनि प्राप्ती नहुने उल्लेख छ । त्यसैगरी मापदण्डमा महासंघको सदस्यता लिएका तर कहिले काही मात्र पत्रकारिता गर्नेको समेत सदस्यता नवीकरण नहुने उल्लेख छ ।
