सुनवल नगरपालिकाले बुधवार सार्वजनिक सुनुवाई कार्यक्रम सम्पन्न गरेको छ । चालु आ.ब ०७९।०८० मा लक्षित विकास निर्माण र सेवा प्रवाहको अवस्थाबारे जानकारी दिन सार्वजनिक सुनुवाई गरिएको हो । सार्वजनिक सुनुवाई कार्यक्रममा नगरवासीले सेवा प्रवाह र विकास निर्माणमा व्यापक चासो व्यक्त गरेका छन् ।
सुनवल नगरपालिकाका नगरप्रमुख बिमला अर्यालको अध्यक्षतामा सम्पन्न सार्वजनिक सुनुवाई कार्यक्रममा नगरभित्रका दर्जनौ सेवा ग्राहीले प्रश्न र सुझावहरु राखेका छन् ।
उनीहरुले नगरपालिकाको खर्चमा मितव्ययिता अपनाउनु पर्ने, महिला हिंसा रोक्न अभियानका साथै सुरक्षित आवाशको व्यवस्था गर्नु पर्ने, महिला उद्यम केन्द्रलाई प्रभावकारी बनाउनु पर्ने, सहकारी क्षेत्रको विकासकालागि सहकारी प्रवद्र्धन कोषको स्थापना गर्नु पर्ने माग राखेका छन् । यस्तै शिक्षा स्वाथ्य र रोजगारकालागि नगरपालिकाले बनाएको रणनीतिक योजना कार्यान्वयमा ल्याउनु पर्ने सुझाव दिएका छन् । १ वडा एक खेलमैदान, डाँकापानीमा रहेको सिमसार क्षेत्रको विकास, नदिजन्य पदार्थको चोरी निकासी रोक्न पालिकाको ठोस योजना के छ भनि प्रश्न गरेका छन् ।
सार्वजनिक सुनुवाई कार्यक्रममा नगरप्रमुख बिमला अर्यालले नगरवासीहरुले सोधेका प्रश्नहरुको जवाफ दिनु भएको छ । उहाँले समृद्ध सुनवल निर्माणमा नगरवासीहरुसँग हातेमालो गरेर अगाडि वढ्ने बताउनु भयो । निःशुल्क खानेपानीको व्यवस्थाबारेको प्रश्नमा नगरप्रमुख अर्यालले हाल १२ सय जना नगरवासीले निःशुल्क पानीको सुविधा लिएको वताउनु भयो । उहाँले नागरिकलाई अधिकार सम्पन्न बनाउनु सरकारको दायित्व भएको दावि गर्नु भयो ।
कार्यक्रममा नगर उपप्रमुख सूर्य प्रसाद दुवेले सुनवल नगरपालिकाको विकासमा सवै जनप्रतिनिधिहरुले योजना निर्माण गर्दा सर्वसम्मत हुने गरेको बताउनु भयो । सुनवलको विकासमा नगरप्रमुख र उपप्रमुखको सम्बन्धबारे सेवाग्राहीले सोधेको प्रश्नमा उहाँले प्रमुख र उपप्रमुख बीच कुनै पनि प्रकारको विमती नभएको जिकिर गर्नु भएको छ ।
कार्यक्रममा सुनवल शिक्षा शाखाका प्रमुख विष्णु प्रसाद गोतामे, वडा नं. १ का अध्यक्ष मनवहादुर थापा, वडा नं. ४ का अध्यक्ष बालकृष्ण पंगेनी, वडा नं. ५ का अध्यक्ष नेत्रलाल शर्मा तिवारी, वडा नं. ११ का वडाअध्यक्ष कमल प्रसाद चुवाई, वडा नं. १२ का अध्यक्ष चुरामणी पौडेल, नगरकार्यपालिका सदस्य सिता तिमिल्सीना लगायतले सेवा ग्राहीबाट आएका प्रश्नको जवाफ दिनु भएको थियो ।
कार्यक्रममा प्रमुख प्रशासकीय अधिकृत भक्तिराम मरासिनीले चालु आ.ब.२०७९।०८०मा भए गरेका कार्यप्रगति प्रस्तुत गर्नु भएको थियो । कार्यक्रममा नगर कार्यपालिकाका सदस्यहरु, नगरपालिकाका विभिन्न शाखा प्रमुखहरु, सुरक्षा निकायका प्रमुख, विभिन्न वित्तिय संस्था, सामुदायिक वन, सहकारी, उपभोक्ता समितिका पदाधिकारी, आमासमूहका प्रतिनिधिहरुको बाक्लो उपस्थिति रहेको थियो ।
सार्वजनिक सुनुवाई कार्यक्रमको सहजिकरण र व्यवस्थापन सामुदायिक रेडियो परासी ९०.२ मेगाहर्जबाट भएको थियो भने कार्यक्रमको सहजिकरण प्रवन्ध निर्देशक मेघराज गौतमले गर्नु भएको थियो । कार्यक्रमको सामुदायिक रेडियो परासीबाट प्रत्यक्ष प्रसारण समेत गरिएको छ ।
