रामग्राम नगरपालिका वडा नं. ३ स्थित संगमटोल विकास संस्थाको १४ औं बार्षिक साधारण सभा शनिवार परासीमा सम्पन्न भएको छ । संस्थाका अध्यक्ष खगेश्वर पन्थीको अध्यक्षता तथा रामग्राम नगरपालिकाका नगरप्रमुख धनपत यादवको प्रमुख आतिथ्यमा साधारण सभा सम्पन्न भएको हो । कार्यक्रममा नगरप्रमुख यादवले टोलविकास संस्था नगरपालिकाको अभिन्न अंग भएको बताउनु भयो । उहाँले नगरपालिकाले संचालन गरेका विभिन्न अभियानहरुमा टोल विकास संस्थाले महत्वपूर्ण एवं सकारात्मक भूमिका निर्वाह गर्न सक्नेमा जोड दिनुभएको छ ।
यस्तै कार्यक्रममा नगर उपप्रमुख संझना चौधरीले नगरवासीहरुको साथ र सहयोगले अगाडि वढ्ने हौसला प्राप्त भएको भन्दै टोलविकास संस्था र नगरपालिकावीच विकासका हरेक काममा सहकार्य गर्नु पर्ने बताउनु भयो ।
कार्यक्रममा संस्थाको २ आर्थिक बर्षको आम्दानी र खर्चको लेखापरिक्षण प्रतिवेदन तथा संस्थागत प्रगति प्रतिवेदन अध्यक्ष खगेश्वर पन्थीले प्रस्तुत गर्नु भएको थियो । दुवै प्रतिवेदन सर्वसम्मत पारित भएका छन् । साधारण सभा एवं अधिवेशनकै अवसरमा संस्थाले निर्वतमान अध्यक्ष खगेश्वर पन्थी र सचिव रामचन्द्र गौतमलाई टोल विकासको क्षेत्रमा खेलेको भूमिकाको प्रशंसा गर्दै दोसल्ला र सम्मान पत्रद्वारा सम्मान गरेको छ ।
कार्यक्रममा वडा नं. ३ का अध्यक्ष उज्जवल न्यौपाने, उपभोक्ता हित संरक्षण मंचका केन्द्रीय सदस्य रामजी ज्ञवाली, रामग्राम जेसीजका संस्थापक अध्यक्ष श्यामकुमार वश्याल, सामुदायिक रेडियो परासी ९०.२ मेगाहर्जका प्रवन्ध निर्देशक मेघराज गौतम, नमूना महिला समाजकी अध्यक्ष सरीता पौडेल लगायतले शुभकामना व्यक्त गर्नु भएको संस्थाकी उपाध्यक्ष यमकुमारी सुवेदीले जानकारी दिनुभयो ।
संस्थाले शनिवार नै साताै अधिवेशन पनि सम्पन्न गरेको छ । संस्थाका सदस्य शिव प्रसाद भट्टराईको अध्यक्षतामा पाँच सदस्यीय नयाँ कमिटि सर्वसम्मत चयन भएको छ । जसको उपाध्यक्षमा यमकुमारी सुवेदी, सचिवमा रजनि ढकाल, कोषाध्यक्षमा रणप्रताप राणा र सहसचिवमा लक्ष्मण ज्ञवाली सर्वसम्मत चयन हुनु भएको छ ।
