नवलपरासीको बुद्धशान्ति साझेदारी वन व्यवस्थापन समूहको साधारण सभा शनिवार परासीमा सम्पन्न भएको छ । रामग्राम नगरपालिका वडा नं. १८ मा मूख्य कार्यालय राखेर संचालन भएको समूहले आज साधारण सभा सम्पन्न गरेको हो ।
संस्थाका कार्यवाहक संयोजक चन्द्रमणी चौधरीको अध्यक्षता र प्रतिनिधि सभा सदस्य एवं पूर्व कानून, न्याय तथा संसदीय मन्त्री धु्रववहादुर प्रधानको प्रमुख आतिथ्यमा साधारण सभा गरिएको हो । सो अवसरमा बोल्दै पूर्व मन्त्रि प्रधानले “नवलपरासी जिल्लाको विकासकालागि जो जहाँ छ, त्यहीबाट कुशलतापूर्वक कामको शुरुवात गरौ, मिलेर काम गरौ विकास सम्भव छ” भन्नु भयो । उहाँले बुद्धशान्ति साझेदारी वन व्यवस्थापन समूहलाई नै इंकित गर्दै वन समुहबाटै राम्रो कामको थालनी गर्न आग्रह गर्नु भयो ।
सो अवसरमा कार्यवाहक संयोजक चौधरीले संस्थाको कार्यप्रगति विवरण साधारण सभामा प्रस्तुत गर्नु भएको थियो भने सदस्य विरेन्द्र प्रसाद चौधरीले कार्यक्रममा स्वागत मन्तव्य व्यक्त गर्नु भएको हो । कार्यक्रममा नेपाली काँग्रेसका केन्द्रीय सदस्य एवं पूर्व गृहराज्य मन्त्री देवेन्द्रराज कण्डेल, लुम्बिनी प्रदेश सभा सदस्य बैजनाथ जैसवाल, जिल्ला समन्वय समितिका प्रमुख भगौती यादवले शुभकामना व्यक्त गर्दै साझेदारी वन व्यवस्थापापनमा तीनै तहको सरकारको जिम्मेवारी रहेको बताउनु भयो ।
यस्तै कार्यक्रममा रामग्राम नगरपालिकाका नगर प्रमुख धनपत यादव, डिभिजन वन कार्यालयका प्रमुख महेन्द्र वाग्लेले डिभिजन वन कार्यालय, साझेदारी वन समूह र स्थानीय सरकारको सहकार्यमा वन क्षेत्रको विकासमा थुप्रै काम गर्न सकिने धारणा व्यक्त गर्नु भएको थियो ।
कार्यक्रममा नेपाली कांग्रेसका कार्यवाहक जिल्ला सभापती विक्रम यादव, नेकपा एमालेका कार्यवाहक अध्यक्ष डोलराज भण्डारी, राष्ट्रिय प्रजातन्त्र पार्टीका प्रवक्ता सन्तोष पाण्डे, जनता समाजवादी पार्टीका जिल्ला अध्यक्ष धरेन्द्र यादव, नागरिक उन्मुक्ति पार्टीका जिल्ला अध्यक्ष ओमप्रकाश चौधरी, लोकतान्त्रीक समाजवादी पार्टीका जिल्ला अध्यक्ष मुकुरजी गिरी, जनमत पार्टीका बाल गोविन्द चौधरी, नेपाल समाजवादी पाटीका अध्यक्ष चन्द्रभुषण पाठक, खानेपानी तथा सरसफाई लुम्बिनी प्रदेशका अध्यक्ष थानप्रसाद गैरे लगायतले साझेदारी वनको साधारण सभामा शुभकामना व्यक्त गर्नु भएको छ ।
बुद्धशान्ति साझेदारी वनले जिल्लाको तीन वटा पालिकालाई आफ्नो कार्यक्षेत्र बनाएको छ । सुनवल र रामग्राम नगरपालिका तथा पाल्हीनन्दन गाउँपालिकालाई कार्यक्षेत्र बनाएको छ । जसअन्तर्गत सुनवलका ३ वटा वडा, रामग्रामका ७ वटा वडा र पाल्हीनन्दनका ३ वटा वडाका १ हजार २ सय घरधुरीका झण्डै ७० हजार जनसंख्यामा वन समूहले सेवा प्रदान गर्दै आएको छ ।
यसैबीच शनिवार आजै वन समूहको नयाँ नेतृत्वकालागि निर्वाचन हुने निर्वाचन समितिका सदस्य अमजद अलि अन्सारीले जानकारी दिनु भयो ।
