नवलपरासी पश्चिम, आ.ब.२०८०।०८१ मा पश्चिम नवलपरासीमा स्वास्थ्य क्षेत्रमा ३५ करोड ९१ लाख ८२ हजार रुपैया बजेट रहेको छ । जिल्लाका सातै स्थानीय तह, स्वास्थ्य कार्यालय र जिल्लामा कार्यरत संघसंस्थाको कुल बजेटलाई यसमा समावेश गरिएको हो । विभिन्न निकायको स्वास्थ्य क्षेत्रको तथ्याङ्कलाई हेर्दा कार्यरत कर्मचारीको तलव र भत्ता वाहेकको रकम खर्च हुने बताइएको छ ।
स्वास्थ्य कार्यालयमा २ करोड ३७ लाखमात्र बजेट
स्वास्थ्य कार्यालय नवलपरासीमा चालु आ.ब.२०८०।०८१ कालागि विभिन्न शीर्षकमा स्वास्थ्य सम्बन्धी गतिविधिका लागि २ करोड ३७ लाख बजेट रहेको छ । स्वास्थ्य कार्यालयले महामारी नियन्त्रण, पोषण, विभिन्न स्वास्थ्य सम्बन्धी शिविर सञ्चालन तथा नियमित खोप सञ्चालनकालागि बजेट खर्च हुने बताएको छ । जसमध्ये गएको ९ महिनामा ४२ प्रतिशत बजेट खर्च भएको स्वास्थ्य कार्यालय नवलपरासीका लेखा अधिकृत नारायण भट्टराईले जानकारी दिनु भयो ।
जिल्लाका पालिकाहरुमा स्वास्थ्य क्षेत्रको बजेट कति छ ?
सुनवल नगरपालिकामा स्वास्थ्य क्षेत्रको आन्तरिक १ करोड ३ लाख र संघीय ससर्त तर्फ ५८ लाख ५० हजार गरी एक करोड ६१ लाख ५० हजार मध्ये ४० प्रतिशत खर्च भएको छ सुनवल सवास्थय शाखाले जनाएको छ ।
यस्तै वर्दघाट नगरपालिकामा आन्तरिक र संघीय ससर्त गरी ५ करोड १ लाख ६१ हजार रहेकोमा गएको फागुन मसान्तसम्म ४९ प्रतिशत खर्च भएको बर्दघाट स्वास्थय शाखाको सूचना अधिकारी पुस्कर काफ्लेले जानकारी दिनु भयो ।
यसैबीच रामग्राम नगरपालिकामा विभिन्न स्वास्थ्य सम्बन्धी कार्यकालागि चालु आ.ब.मा १ करोड ७७ लाख ८६ हजार र संघीय ससर्त बजेट ८२ लाख ८६ हजार गरी कुल २ करोड ६० लाख ७२ हजार गरी कुल ४२ प्रतिशत गएको फागुन मसान्तसम्म खर्च भएको स्वास्थ्य शाखाका अधिकृत सुरज हरिजनले जानकारी दिनु भयो ।
यस्तै जिल्लाका ४ वटा गाउँपालिका मध्ये प्रतापुरमा स्वास्थ्य क्षेत्रमा सवैभन्दा वढी बजेट राखिएको छ भने सबैभन्दा कम सुस्ता गाउँपालिकाम छुट्याइएको छ ।
सुस्ता गाउँपालिकामा स्वास्थ्य क्षेत्रका विभिन्न शीर्षकमा आन्तरिक तर्फ १ करोड ५ हजार र ससर्त तर्फ ७६ लाख १२ हजार गरी १ करोड ७६ लाख १७ हजार बजेट मध्ये गएको ९ महिनामा ४० प्रतिशत खर्च भएको सुस्ता शाखाले जनाएको छ । त्यसै गरि सरावल गाउँपालिकाले चालु आ.ब.मा स्वास्थ्य क्षेत्रमा आन्तरिक र ससर्त गरी ३ करोड ३८ लाख १३ हजार बराबरका विभिन्न योजना सम्पादन गर्ने गरी बजेट विनियोजन भएको थियो । जसमा आन्तरिक तर्फ १ करोड ४८ लाख एक हजार रहेको र गएको ९ महिनामा ४५ प्रतिशत खर्च गरिएको गाउँपालिकाका लेखा अधिकृत नारायण पाण्डेले जानकारी दिनु भयो ।
प्रतापपुर गाउँपालिकामा आन्तरिक तर्फ २ करोड ३४ हजार र ससर्त तर्फ ६ करोड ९ लाख गरी कुल ८ करोड ९ लाख ३४ हजार बजेट खर्च हुने गाउँपालिकाले जनाएको छ ।
यस्तै पाल्हीनन्दन गाउँपालिकामा आन्तरिक तर्फ १ करोड ८० लाख ९९ हजार र ससर्त तर्फ ९६ लाख ३६ हजार बजेट गरी कुल २ करोड ७७ लाख ३५ हजार रहेको र खर्च हुने गाउँपालिकाले जनाएको छ ।
जिल्लामा कार्यरत ११ संस्थाको ८ करोड ३० लाख वढी बजेट
स्वास्थ्य क्षेत्रमा कार्यरत विभिन्न ११ वटा संस्थाहरुले पश्चिम नवलपरासीमा चालु आ.ब २०८०।०८१ मा ८ करोड ३० लाख ७६ हजार ९२६ बराबरको काम गर्ने प्रतिवद्धता जनाएका छन् ।
जिल्लाका इन्द्रणी सामाजिक विकास मञ्च, सुनवल सामुदायिक विकास केन्द्र, बेस नेपाल, द ल्याप्रोसी मिसन नेपाल, ग्रिनतारा नेपाल, चौधरी फाउण्डेशन, किड्स कपिलवस्तु, लुम्बिनी प्लस, आस्था समूह, इमपावर नेपाल र सहभागी संस्था लगायत ११ वटा संस्थाहरुले जिल्लाका सातै पालिकामा स्वास्थ्य क्षेत्रमा काम गर्ने प्रतिवद्धता स्वरुप ८ करोड ३० लाख बढी रकम खर्च गर्न लागेका हुन् ।
जिल्लामा चौधरी फाउण्डेशनले स्वास्थ्य क्षेत्रको क्षमता अभिबृद्धिकोलागि सुस्ता, प्रतापुर, सरावल र बर्दघाटमा सवैभन्दा वढी २ करोड ६५ लाख ५८ हजार ५६० खर्च गर्ने योजना बनाएको छ । यस्तै इन्द्रेणी सामाजिक विकास मञ्चले सामुदायिक स्वास्थ्य परियोजना मार्फत महिला, बालबालिका र युवाहरुका लागि १ करोड ४५ लाख ८३ हजार खर्च गर्ने योजना बनाएको छ भने सुनवल सामुदायिक विकास केन्द्रले सबैभन्दा कम ६ लाख, अपाङ्गता समावेशी विकास परियोजना मार्फत खर्च गर्न लागेको हो । दुबै संस्थाहरुलाई युनाइटेड मिसन टु नेपाल र अट्रेलियन सरकारको सहयोग रहेको छ ।
