परासी । रामग्राम नगरपालिकालाई पूर्ण संस्थागत प्रसुती सेवायुक्त र पुर्ण खोप सुनिश्चितता तथा दिगोपना भएको पालिका घोषणा गरिएको छ । रामग्राममा शनिवार एक औपचारिक कार्यक्रमको आयोजना गरी घोषणा भएको हो । पूर्ण संस्थागत सेवायुक्त पालिका घोषणाका लागि ४ पटक गर्भ जाँच, ३ पटक प्रसुती जाँच र दक्ष स्वास्थ्यकर्मीबाट ९५ प्रतिशत स्वास्थ्य संस्थामा सुत्केरी गराएपछि प्रोटोकल पूरा हुने र घोषणाकालागि स्वीकृती दिन सकिने व्यवस्था रहेको छ । रामग्राम नगरपालिकाले सवै प्रोटोकल पूरा गरेकाले पूर्ण प्रसुती सेवायुक्त नगरपालिका घोषणा गरिएको जिल्ला प्रजनन स्वास्थ्य समितिका संयोजक तथा जिल्ला समन्वय समितिका प्रमुख भगौती यादव रुदलले बताउनु भयो ।
यसअघि रामग्राम नगरपालिकाले पूर्ण संस्थागत प्रसुती सेवायुक्त पालिका घोषणाकालागि मातृशिशु कार्यक्रमलाई प्रभावकारी बनाएको थियो । नगरपालिकाले साप्ताहिक रुपमा ८ वटा स्वास्थ्य संस्थामा भिडियो एक्स रे सेवा प्रदान गरेको, १७ वटा स्वास्थ्य संस्थाबाट आधारभूत स्वास्थ्य सेवा प्रदान गरिएको, स्वास्थ्यकर्मीद्वारा घरदैलो कार्यक्रम सञ्चालन, नियमित खोप सञ्चालन निशुल्क एम्बुलेन्स सेवा सहित गर्भवती तथा सुत्केरीलाई पोषकतत्व वितरण गरिएको बताइएको छ ।
कार्यक्रममा रामग्राम नगरपालिका देशकै चौथो पूर्ण संस्थागत प्रसुती सेवायुक्त पालिका भएको रामग्राम नगरपालिकाले जनाएको छ । रामग्राममा चालु आर्थिक बर्ष ०८०।०८१ मा १ हजार २२ जना सुत्केरी भएका छन् ।
यस्तै रामग्राम नगरपालिकाले नगरलाई पूर्ण खोप र दिगोपना भएको नगर घोषणा गरेको छ । लक्षित बालबालिकाहरुले १५ महिनासम्मको उमेरमा लगाउनु पर्ने सबै खोपहरु लगाएको र खोप लगाउन छुटेका २६ बालबालिकाले पनि पूर्ण खोप पूरा गरेका छन् । यसरी १०० प्रतिशत खोप पुरा भएकाले दिगोपन भएको नगर घोषणा सम्भव भएको स्वास्थ्य शाखाका अधिकृत सुरज हरिजनले जानकारी दिनु भयो ।
कार्यक्रम रामग्राम नगरपालिकाका नगरप्रमुख धनपत यादवको अध्यक्षता र प्रतिनिधि सभा सदस्य ध्रुवबहादुर प्रधानको प्रमुख आतिथ्यमा भएको हो । सो क्रममा साँसद प्रधानले आफूले २०४३ सालमै पृथ्वीचन्द्र अस्पतालमा प्रसुती गृह बनाएर सुरक्षित प्रसुतीको अभियान शुरु गरेको स्मरण गर्नु भयो । उहाँले अहिले स्वास्थ्य क्षेत्रमा देखिएका सुधारले आफूलाई सन्तुष्टी मिलेको बताउनु भयो ।
कार्यक्रममा लुम्बिनी प्रदेश स्वास्थ्य निर्देशनालयका निर्देशक डा.बिनोद गिरी, रामग्राम नगर उपप्रमुख सम्झना चौधरी, प्रमुख जिल्ला अधिकारी सुरेश पन्थी, स्वास्थ्य कार्यालय नवलपरासीका प्रमुख ओमप्रकाश पन्थी, नेपाल पत्रकार महासंघका सचिव एवं सामुदायिक रेडियो परासीका अध्यक्ष राजकुमार रेश्मी लगायतले घोषणा सभामा शुभकामना व्यक्त गर्नु भएको थियो । शुभकामना व्यक्त गर्ने सबै बक्ताहरुले दिगोपनामा जोड दिनुपर्ने आग्रह गरेका छन् । नगरपालिकाले घोषणामा सहकार्य गर्ने स्वास्थ्य संस्था, स्वास्थ्यकर्मी, विभिन्न सरकारी तथा गैरसकारी संघ संस्थालाई सम्मान गरेको छ ।
यसअघि रामग्राम नगरपालिका सबै वडा गत चैत्र २० गते नै घोषणा भएका थिए । नगरपालिकाले वडा घोषणा लगत्तै नगर घोषणाकालागि जिल्ला प्रजनन स्वास्थ्य समन्वय समितिलाई चैत्र २० गते नै पत्राचार गरेको थियो । जिल्लाले अध्ययन गरी २०८१ जेष्ठ ११ गते अनुमति दिएको हो । सोहि अनुसार शनिवार रामग्राम नगरपालिकाले पूर्ण संस्थागत प्रसुति सेवायुक्त पालिका घोषणा गरेको छ ।
