परासी । वर्दघाट खानेपानी तथा सरसफाई उपभोक्ता संस्थामा सञ्चालित नगरस्तरीय खानेपानी परिक्षण प्रयोगशालाको शनिवार औपचारीक शुभारम्भ गरिएको छ । वर्दघाट नगरपालिका र उपभोक्ता संस्थाले संयुक्त रुपमा सञ्चालन गरेको प्रयोगशाला विधिवत रुपमा उद्घाटन गरिएको हो ।
वर्दघाट खानेपानी तथा सरसफाई उपभोक्ता संस्थाका अध्यक्ष दिपक लम्सालको अध्यक्षतामा बर्दघाट नगरपालिकाका नगरप्रमुख शम्भुलाल श्रेष्ठले नगरस्तरीय खानेपानी परिक्षण प्रयोगशालाको उद्घाटन गर्नु भएको हो ।
वर्दघाट नगरपालिकाले नगरवासीलाई शुद्ध पिउने पानी उपलब्ध गराउन वर्दघाट खानेपानी संस्थालाई करिव ४ लाख बराबरको पानी परिक्षण किट उपलब्ध गराएको बताइएको छ ।
नियमित परिक्षण हुँदै आएको प्रयोगशालामा परिक्षण किटको उपलब्धताले पानीको गुणस्तर परिक्षणलाई थप सहयोग मिलेको संस्थाले जनाएको छ । पानीमा धमिलोपन, हाइड्रो बिभव, शूक्ष्म जैविक –इकोली, कोलोरिन, टि.डि.एच र आर्सेनिक परिक्षणलाई नियमित गरिदै आएको संस्थाका प्राविधिक पूर्णबहादुर थापालले जानकारी दिनु भयो । उहाँले पानीको नियमित परिक्षण आवश्यक भएको भन्दै हानीकारक तत्वहरु नभएको पानी पिउन उपभोक्ताहरुलाई सुझाव दिनु भएको छ ।
सो अवसरमा वर्दघाट नगरपालिकाका नगरउपप्रमुख रुद्र प्रकाश उपाध्याय, वडा नं.४ का वडाध्यक्ष बेदविना तिवारी, संस्थाका पदाधिकारी, खानेपानी सुरक्षा योजना समिति, नगरभित्र सञ्चालित खानेपानी आयोजनाका अध्यक्षहरुको उपस्थिति रहेको संस्थाका व्यवस्थापक विष्णु भुषालले जानकारी दिनु भयो ।
