नवलपरासीको सदरमुकाम परासीमा सडक पूर्वाधार विकास कार्यालय स्थापना

विकास निर्माण

Home
विकास निर्माण
नवलपरासीको सदरमुकाम परासीमा सडक पूर्वाधार विकास कार्यालय स्थापना

नवलपरासीको सदरमुकाम परासीमा सडक पूर्वाधार विकास कार्यालय स्थापना

परासी । सोमबार नवलपरासीको सदरमुकाम परासीमा सडक पूर्वाधार विकास कार्यालय स्थापना भयो । जिल्ला समन्वय समितिको नयाँ बन्दै गरेको भवनमा सोमबार लुम्बिनी प्रदेशका कार्यवाहक मुख्यमन्त्री एंव भौतिक पूर्वाधार विकास मन्त्री भूमिश्वर ढकालले कार्यालय उद्घाटन गर्नु भएको हो । यसअघि लुम्बिनी प्रदेशका ११ जिल्लामा सडक पूर्वाधार विकास कार्यालय स्थापना भई सञ्चालनमा आएका थिए । यसअघि नवलपरासीमा सञ्चालन हुने सवै पूर्वाधारका आयोजना रुपन्देही जिल्लाबाट सञ्चालन हुँदै आएको थियो ।

जिल्लामा स्थापना भएको कार्यालयले लुम्बिनी प्रदेश मातहतका सडक र पुल आयोजनाहरुको काम गर्ने जनाइएको छ । कार्यालय सञ्चालनका लागि आठौं तहका एक इन्जिनियरसहित १३ जना कर्मचारीको दरबन्दी रहेको सडक पूर्वाधार विकास महाशाखाका प्रमुख विनोद चौधरीले बताउनु भयो ।

कार्यालय उद्घाटन कार्यक्रममा वन तथा वातावरण मन्त्री देवकरण कलवार(सन्तु), पूर्वमन्त्री खड्क बस्नेत, प्रदेश सभा सदस्य बैजनाथ कलवार, जिल्ला समन्वय समितिका प्रमुख भगौती यादव, रामग्राम नगरपालिकाका प्रमुख धनपत यादव, प्रतापपुर गाउँपालिकाका अध्यक्ष उमेशचन्द्र यादव, रामग्राम नगरपालिकाकी उपप्रमुख सम्झना चौधरी, प्रमुख जिल्ला अधिकारी स्किम श्रेष्ठ लगायतले नवलपरासी जिल्लाको विकासका बारेमा चर्चा गर्नु भएको छ ।

कार्यक्रम भौतिक पूर्वाधार विकास मन्त्रालयका सचिव भिमार्जुन पाण्डेको अध्यक्षतामा सम्पन्न भएको हो । सडक पूर्वाधार विकास कार्यालय स्थापना भए पनि जिल्ला समन्वय समितिको भवन भने उद्घाटन भएको छैन । यसअघि कार्यालय बर्दघाटमा स्थापना गर्ने व्यापक चर्चा थियो ।

प्रकाशित मिति: मंगलबार, कात्तिक २७, २०८१ ०५:५०

प्रतिक्रिया दिनुहोस्