पृथ्वीचन्द्र अस्पतालले पहिलो पटक सामाजिक परीक्षण गर्‍यो

स्वास्थ्य

Home
स्वास्थ्य
पृथ्वीचन्द्र अस्पतालले पहिलो पटक सामाजिक परीक्षण गर्‍यो

पृथ्वीचन्द्र अस्पतालले पहिलो पटक सामाजिक परीक्षण गर्‍यो

परासी । पृथ्वीचन्द्र अस्पताल परासीले पहिलो पटक सामाजिक परीक्षण कार्यक्रम सम्पन्न गरेको छ। अस्पतालको सेवा प्रवाह बारे जानकारी दिने तथा भए गरेका सेवा प्रवाहको गुणस्तरमापन गर्ने उद्देश्यले सामाजिक परीक्षण कार्यक्रम गरिएको अस्पताल स्रोतले जनाएको छ। अस्पतालले आर्थिक वर्ष २०८०। २०८१ को अवधिमा भएका सेवा प्रवाह र प्रगति प्रतिवेदन सार्वजनिक गरेको छ।

अस्पताल विकास समितिका अध्यक्ष महेन्द्रप्रसाद गुप्ताको अध्यक्षता र लुम्बिनी प्रदेश सभाका सांसद बैजनाथ कलवारको प्रमुख आतिथ्यमा सामाजिक परीक्षण कार्यक्रम सम्पन्न भएको बताइएको हो । सो अवसरमा सांसद कलवारले अस्पतालको सामाजिक, भौतिक तथा स्वास्थ्य उपकरण के के आवश्यक हो सोको सूची बनाएर दिन अस्पताल व्यवस्थापन समितिलाई अनुरोध गर्नुभएको छ। उहाँले प्रदेश आगामी आर्थिक वर्षको बजेटमा पूर्ण रुपमा उपलब्ध गराउने प्रतिबद्धता समेत व्यक्त गर्नुभयो ।

सामाजिक परीक्षण कार्यक्रममा उपस्थित विभिन्न क्षेत्रका सरोकारवालाहरूले अस्पताल पूर्ण क्षमतामा सञ्चालन गर्न आवश्यक स्रोत, साधन र समन्वय आवश्यक रहेको औल्याएका छन्।
कार्यक्रममा जिल्ला समन्वय समितिका प्रमुख भगौती यादव रुदलले जिल्ला अस्पतालको विकासका लागि आफूले जिल्ला प्रदेश र सङ्घ लगायतका सरकार र विभिन्न पक्षसँग समन्वय र सहकार्य गर्ने प्रतिबद्धता व्यक्त गर्नुभएको छ।

सो अवसरमा स्वास्थ्य कार्यालय नवलपरासीका प्रमुख गौरव ढकाल, नेपाल पत्रकार महासङ्घ नवलपरासीका अध्यक्ष केशव पराजुली, नागरिक समाजका अध्यक्ष राधेश्याम सिंह सैथवार, भ्रष्टाचार विरुद्धको नागरिक निगरानी समूहका अध्यक्ष रामजी ज्ञवाली, रोटरी क्लब अफ नवलपरासीका अध्यक्ष सुनिल कसोधन, अर्जुनबहादुर क्षेत्री लगायतले बोल्दै अस्पताल सञ्चालन र व्यवस्थापनका लागि सहयोग गर्ने तथा अस्पतालको व्यवस्थापन सुधारमा दर्जनौं सुझावहरू दिनुभएको छ ।

कार्यक्रममा प्राप्त सुझाव र सल्लाहहरूलाई क्रमैसँग सम्बोधन गर्ने र आगामी दिनमा विभिन्न पक्षसँग सहकार्य गरेर अस्पतालको विकासमा काम गर्ने अस्पतालका मेडिकल सुपरिटेन्डेन्ट डाक्टर मोहम्मद नुरुल होदाले प्रतिबद्धता व्यक्त गर्नुभएको छ ।

अस्पतालको सामाजिक परीक्षण सामुदायिक रेडियो परासी ९०.२ मेगाहर्जका प्रबन्ध निर्देशक मेघराज गौतमले गर्नुभएको अस्पतालका प्रशासकीय अधिकृत गोविन्दबहादुर ज्ञवालीले जानकारी दिनुभयो ।

प्रकाशित मिति: आइतबार, माघ ६, २०८१ ०६:३८

प्रतिक्रिया दिनुहोस्