सुनवल । नवलपरासीको सुनवल नगरपालिकामा देशकै पहिलो ‘भजन घर’ स्थापना भएको छ । लोक संस्कृतिको जगेर्ना गर्ने उद्देश्यले ‘भजन घर’ स्थापना गरिएको हो ।
राष्ट्रिय लोक भजन चुड्का संस्कृति संरक्षण प्रतिष्ठान नेपाल सुनवल नगर कार्यसमितिले सुनवल नगरपालिका वडा नं. १ मा नेपालमै पहिलो ‘भजन घर’ को शुरुवात गरेको हो । प्रतिष्ठानका अध्यक्ष रमेश तिवारीको अध्यक्षता र सुनवल नगरपालिकाकी नगरप्रमुख बिमला अर्यालयको प्रमुख आतिथ्यमा देशकै पहिलो ‘भजन घर’ को समुदघाटन भएको हो । सो अवसरमा नगरप्रमुख अर्यालले भजन टुक्का हाम्रो धार्मिक, सामाजिक र साँस्कृतिक परंपरासँग गाँसिएको बताउनु भयो । उहाँले संगीतका माध्यमबाट समुदायमा एकता, मेलमिलाप र धार्मिक सहिष्णुता बढाउनेमा जोड दिनु भयो ।
नगरप्रमुख अर्यालले संस्कार, संस्कृतिको विकास र प्रवद्र्धन गर्न आगामी दिनमा सुनवल नगरपालिकाले कुनै कसर वाँकी नराख्ने बताउनु भएको हो ।
भजन टुक्कामा मादल, झ्याली, मञ्जिरा, हार्मोनियम, तबला, ढोलक, सारङ्गी र शंङ्ख जस्ता परंपरागत बाजाहरु प्रयोगमा ल्याइन्छ । यी सामाग्रीहरुको प्रयोगले भजनलाई ताल र लय दिन्छन् भने सामूहिक गायनमा एकरुपता र साँगीतिक वातावरण तयार हुन्छ ।
भजन टुक्कामा भगवानको महिमा र स्तुति, धार्मिक तथा पौराणीक प्रसंग, सामाजिक जीवन, वातावरण र पर्यावरणलाई भजन टुक्काका विषयवस्तु बनाउने गरिएको छ ।
कार्यक्रममा प्रतिष्ठानका केन्द्रीय अध्यक्ष नारायण लेकाली, लुम्बिनी प्रदेशका अध्यक्ष काशीराम पोखरेल, नवलपरासी जिल्ला अध्यक्ष तीर्थ सापकोटा, सुनवल नगरपालिका वडा नं. ६ का अध्यक्ष दिलिप चापागाई,ं प्रतिष्ठानका उपाध्यक्ष थानप्रसाद तिवारी, सुनवल वडा नं. ११ का अध्यक्ष नारायण भुर्तेल लगायतले शुभकामना व्यक्त गर्नु भएको कार्यक्रम सञ्चालक एवं प्रतिष्ठान सुनवलका सदस्य नमाकान्त बस्यालले जानकारी दिनुभयो ।
कार्यक्रममा केन्द्रीय अध्यक्ष लेकाली, जिल्ला अध्यक्ष सापकोटा र सुनवल नगर अध्यक्ष तिवारीले भजन टुक्का गाएर मनोरन्जन प्रदान गर्नु भएको थियो । सुनवल १ मा स्थापना भएको ’भजन घर‘ मा प्रत्येक शुक्रवार भजन गायन कार्यक्रम गरिने प्रतिष्ठान सुनवलकी सहसचिव केशरी थापाले नेपाली चेलीलाई जानकारी दिनुभयो ।
