परासी । श्रीकृष्ण जन्माष्टमी पर्व आज भगवान श्रीकृष्णको पूजाआजा र आराधना गरी मनाइदैछ। शुक्रबार राति १२ बजेदेखि विभिन्न कृष्ण मन्दिरहरूमा कृष्णको पूजा गरी शनिबार राति १२ बजे सम्म कृष्णको पूजा आजा गरिने प्रचलन रही आएको छ ।
नेपाल लगायत संसारभरका हिन्दू धर्मावलम्बीहरूले श्रीकृष्णको जन्मदिन मनाउने गर्दछन्। कृष्ण आजैको दिन मामा कंशको कैदमा रहेका पिता वासुदेव र माता देवकीको गर्भबाट जन्म भएको मान्यता रहिआएको छ ।
कृष्णलाई विभिन्न ठाउँ अनुसार गोविन्द, कान्हा, कन्हैया, काले, मुरली मनोहर, श्यामसुन्दर, माखनचोर आदि थुप्रै नामबाट बोलाउने प्रचलन छ ।
नवलपरासीका विभिन्न पालिकाहरूमा गएराती १२ बजेदेखि नै विभिन्न कृष्ण मन्दिरहरूमा "हरे कृष्ण हरे कृष्ण कृष्ण हरे हरे, हरे राम हरे राम राम हरे हरे " को नामबाट पूजाआजा भइरहेको छ।
कृष्ण जन्माष्टमीको महत्व धार्मिक, सांस्कृतिक र नैतिक तीनवटै दृष्टिले गहिरो छ।
आजको दिनलाई भगवान श्रीकृष्णको अवतार दिनका रूपमा मनाइन्छ। हिन्दू धर्मग्रन्थ अनुसार, श्रीकृष्ण भगवान विष्णुको आठौं अवतार मानिन्छन्, जसले अन्याय, अधर्म र अत्याचारको अन्त्य गर्न जन्म लिएको विश्वास छ।
भागवत गीता, महाभारत जस्ता धर्मग्रन्थमा कृष्णले दिएको उपदेशलाई धर्म, कर्म र भक्तिको मार्गदर्शनका रूपमा मानिन्छ। आजको दिन व्रत, पूजा, भजन-कीर्तन, रात्रि जागरण गरी कृष्णप्रति भक्तिभाव व्यक्त गरिन्छ।
कृष्ण जन्माष्टमी नेपाल, भारत लगायतका देशहरूमा उत्साहपूर्वक मनाइन्छ। विशेष गरी मन्दिरहरूमा झाँकी, नाटक ("रासलीला") र सांस्कृतिक कार्यक्रमहरू आयोजना हुन्छन्।
गाउँघरमा बालबालिकाले "दही-हाण्डी" प्रतियोगिता, भजन-गान र झाँकी प्रदर्शन गर्छन्, जसले समुदायमा एकता र उत्सवको वातावरण बनाउँछ भने कृष्णको जीवनले सत्य, धर्म र अन्यायविरुद्ध लड्ने प्रेरणा पनि दिन्छ।
यसरी, कृष्ण जन्माष्टमी केवल एक धार्मिक पर्व मात्र नभई जीवनलाई सकारात्मक, सत्यनिष्ठ र धर्मपरायण बनाउन प्रेरणा दिने एक महत्त्वपूर्ण अवसर हो।
