चेली संवाददाता, सुनवल । ६२७ घरधुरी सङ्ख्या सदस्य रहेको मूलपानी सामुदायिक वन उपभोक्ता समूहको १२औ वार्षिक साधारण सभा बुधबार सम्पन्न भएको छ।
सुनवल नगरपालिका वडा नम्बर ४ स्थित दामोदरकुण्डमा समूहका अध्यक्ष यज्ञप्रसाद पाण्डेको अध्यक्षता र लुम्बिनी प्रदेश सभा सदस्य एवं पूर्वमन्त्री खड्ग बस्नेतको प्रमुख आतिथ्यमा साधारण सभा सम्पन्न भएको हो।
पूर्वमन्त्री बस्नेतले सामुदायिक वन मार्फत समाजमा समृद्धि ल्याउने उपायको खोजी गर्न अनुरोध गर्नुभएको छ। उहाँले हरियो वन नेपालको धन लाई नारामा मात्र सीमित राख्न नहुने बताउनुभयो ।
१२ औँ वार्षिक साधारण सभामा समूहका कोषाध्यक्ष अवधेश कुमार यादवले आर्थिक वर्ष २०८१ र ८२ को आयव्य प्रस्तुत गर्नुभएको छ । जसमा २ करोड ४१ लाख १० हजार ४१६ बराबरको कारोबार भएको बताइएको छ। यस्तै सचिवको प्रतिवेदन समूहका सचिव समीक्षा बलाल सिन्जापतिले र लेखा प्रतिवेदन लेखा सदस्य सरोज श्रेष्ठले प्रस्तुत गर्नुभएको छ।
कार्यक्रममा वैज्ञानिक वन उपभोक्ता राष्ट्रिय महासङ्घ लुम्बिनी प्रदेशका महासचिव होमबहादुर गुरुङ, सुनवल नगर उपप्रमुख सूर्य दुबे, महाकवि देवकोटा क्याम्पसका अध्यक्ष कृष्णप्रसाद लामिछाने, डिभिजन वन कार्यालयका प्रमुख राजु केसी, उपभोक्ता सुरेश यादव र सम्मानित खेमराज पौडेल लगायतले शुभकामना मन्तव्य व्यक्त गर्नुभएको थियो ।
३ सय २९ हेक्टर क्षेत्रफलमा फैलिएको वन २०७१ असोज ८ गते तत्कालीन जिल्ला वन कार्यालयबाट हस्तान्तरण भई २०७४ देखि वैज्ञानिक वन व्यवस्थापन गरिएको समूहका उपाध्यक्ष प्रभुलाल मौर्यले नेपाली चेली अनलाइनलाई जानकारी दिनुभयो।
मूलपानी सामुदायिक वन उपभोक्ता समूहको कार्यक्षेत्र सुनवल नगरपालिका वडा नम्बर १ देखि ४, पाल्हीनन्दन गाउँपालिका वडा नम्बर १ र रामग्राम नगरपालिका वडा नम्बर ४ रहेको छ।
