बुटवल — नेपाल ललितकला प्रज्ञा–प्रतिष्ठानको आयोजना तथा नेपाल व्यावसायिक कलाकार सङ्घ रुपन्देही र कालिका मानवज्ञान माध्यमिक विद्यालयको सह–आयोजनामा बुटवलमा ‘लुम्बिनी प्रादेशिक ललितकला प्रदर्शनी २०८२’ सुरु भएको छ।
शनिबार कालिका मानवज्ञान माध्यमिक विद्यालयमा सुरु भएको प्रदर्शनीको प्रतिष्ठानका कुलपति नारदमणि हार्तम्छाली र बुटवल उपमहानगरपालिकाका प्रमुख खेलराज पाण्डेयले संयुक्त रूपमा उद्घाटन गर्नुभएको छ।
उद्घाटन समारोहमा बोल्दै प्रमुख अतिथि कुलपति हार्तम्छालीले राष्ट्र र समाजको भौतिक विकाससँगै संस्कृति, शान्ति र विकासका लागि ललितकलाको विशेष भूमिका रहेको बताउनुभयो। उहाँले नेपालमा कलाको मर्मलाई जराबाटै उठाउनुपर्ने आवश्यकता औँल्याउँदै स्थानीय जनजीवनलाई प्रतिबिम्बित गर्ने उद्देश्यले प्रादेशिक स्तरमा प्रदर्शनी आयोजना गरिएको जानकारी दिनुभयो।
बुटवल उपमहानगरपालिकाका प्रमुख खेलराज पाण्डेयले बुटवल ऐतिहासिक सम्भावना बोकेको मुख्य केन्द्र भएको उल्लेख गर्दै कलाकारहरूले कलाका माध्यमबाट यस्ता विषयवस्तु उजागर गर्नुपर्ने बताउनुभयो। उहाँले यस्ता सिर्जनात्मक गतिविधिलाई नगरपालिकाले आवश्यक सहयोग गर्ने प्रतिबद्धता व्यक्त गर्नुभयो।
कार्यक्रममा प्रतिष्ठानका मूर्तिकला विभाग प्रमुख तथा लुम्बिनी प्रदेश समन्वय समिति संयोजक दिनेश्वर महतोले प्रदेश र स्थानीय तहले ललितकलाको विकास तथा प्रवर्धनमा अग्रणी भूमिका खेल्नुपर्नेमा जोड दिनुभयो। प्रदर्शनीमा लुम्बिनी प्रदेशका कला, संस्कृति, पर्यटन र जनजीवन झल्कने कलाकृतिहरू समावेश गरिएको उहाँले जानकारी दिनुभयो।
कार्यक्रममा प्रतिष्ठानका समसामयिक चित्रकला विभाग प्रमुख संजय बान्तवा, प्राज्ञसभा सदस्य जुपिटर प्रधान, कालिका मानवज्ञान माध्यमिक विद्यालयका सहायक प्राचार्य पीताम्बर बन्जाडे तथा कलाकार एच.भी. रम्तेलले आ–आफ्ना धारणा राख्नुभएको थियो।
नेपाल व्यावसायिक कलाकार सङ्घ रुपन्देहीका अध्यक्ष दिलीप रसालीले स्वागत मन्तव्य राख्नुभएको कार्यक्रमको सञ्चालन जङ्ग पहाडीले गर्नुभएको थियो।
प्रदर्शनीमा समसामयिक चित्रकला र मूर्तिकला, शिल्प–हस्तकला, वास्तुकला, लोककला, बहुआयामिक तथा अन्य सिर्जनात्मक विधाका ११५ जना कलाकारका १५० भन्दा बढी कलाकृतिहरू प्रदर्शित छन्। नेपाल पर्यटन बोर्ड कला प्रवर्धक रहेको प्रदर्शनी माघ २१ गतेसम्म सञ्चालन हुने आयोजकले जनाएको छ।
