रामग्रामका ओशिन र महेश क्लव स्तरीय ब्याडमिन्टनको उपाधी जित्न सफल

खेलकुद

Home
खेलकुद
रामग्रामका ओशिन र महेश क्लव स्तरीय ब्याडमिन्टनको उपाधी जित्न सफल

रामग्रामका ओशिन र महेश क्लव स्तरीय ब्याडमिन्टनको उपाधी जित्न सफल

पूर्वाधारले सुसम्पन्न कभर्डहलमा अव नयाँ र सम्भावनायुक्त युवा खेलाडिहरूलाई प्राथमिकता दिन आग्रह
आगामी दिनमा पनि म्याट बिच्छ्याउने गरी सहयोग गर्ने प्रतिवद्धता: नगरप्रमुख धनपत यादव
उत्कृष्ट महिला खेलाडि प्रिया गौंड र उदयमान खेलाडि ओशिन थापा पुरस्कृत

परासी । रामग्राम ब्याडमिन्टन क्लव स्तरीय डबल्स ब्याडमिन्टन प्रतियोगिता आज सम्पन्न भएको छ । भदौ ५ गतेदेखि शुरु भएको प्रतियोगिता तीन दिनसम्म चलेको थियो । क्लवका सिनियर र जुनियर खेलाडिहरू सहभागिता भएको प्रतियोगितामा ओशिन थापा र महेश कुँवरको जोडि प्रथम भएको हो भने हिरा जर्घा र कृष्ण अग्रहरीको जोडि द्वितीय भएको छ ।

क्लव स्तरीय मैत्रीपूर्ण प्रतियोगितामा सन्तोष पाण्डे—अजय चौधरीको जोडि र प्रज्ववल खड्का— प्रिया गौंडको जोडि तृतीय स्थान हासिल गर्न सफल भएका हुन् ।

४४ जना खेलाडिहरूको २२ वटा टिम निर्माण गरी गरिएको प्रतियोगिता पुरस्कार वितरण रामग्राम नगरपालिकाका नगरप्रमुख धनपत यादवले गर्नु भएको छ । नगरप्रमुख यादवले पूर्वाधारले सुसम्पन्न कभर्डहलमा अव नयाँ र सम्भावनायुक्त युवा खेलाडिहरूलाई प्राथमिकता दिन आग्रह गर्नुभयो । उहाँले नगरभित्रका अन्य खेल पूर्वाधारको तुलनामा ब्याडमिन्टन खेलको पूर्वाधार सुविधा सम्पन्न भएकोले पनि नयाँ खेलाडि उत्पादनका लागि प्रशिक्षण आवश्यक भएको बताउनु भयो ।

नगरप्रमुख यादवले नगरपालिकाबाट पूर्वाधार विकासका लागि धेरै पटक लगानी भएको भन्दै आगामी दिनमा पनि म्याट बिच्छ्याउने गरी सहयोग गर्ने प्रतिवद्धता ब्यक्त गर्नु भएको क्लवका अध्यक्ष ताराचन्द्र बर्माले जानकारी दिनुभयो ।

प्रतियोगितामा बिजेता खेलाडि समूहलाई नगद, प्रमाण पत्र र शिल्ड वितरण गरिएको खेल संयोजक पूर्णसिंह थापा हेमन्तले बताउनु भयो । तीन दिनसम्म सञ्चालन भएको प्रतियोगितामा उत्कृष्ट महिला खेलाडि प्रिया गौंड र उदयमान खेलाडि ओशिन थापालाई पुरस्कृत गरिएको क्लवले जनाएको छ ।

प्रकाशित मिति: शनिबार, भदौ ७, २०८२ १३:३२

प्रतिक्रिया दिनुहोस्