पृष्ठभूमीः
वि.सं. २००६ साल बैशाख १० मा नेपालमा पहिलो पटक कम्यूनिष्ट पार्टीको बिजारोपण भयो । आज पार्टीले आफ्नो स्थापनाको ७५ बर्ष पार गरेको छ । पुष्पलाल श्रेष्ठको अगुवाईमा बनेको संगठनले आज देश भर विभिन्न फूर्को जोडेर कम्यूनिष्ट विचारधाराको प्रतिनिधित्व गरिरहेका छन् तर मूलधारको नेतृत्व र आमजनताको भरोषायोग्य संगठनको रुपमा नेकपा एमाले बन्दै आइरहेको छ । पार्टीले “समृद्ध नेपाल, सुखी नेपाली” को राष्ट्रिय आकांक्षा पूरा गर्ने सोंच र मुलुकलाई आउँदो २५ बर्षभित्र समृद्ध र समुन्न राष्ट्रका रुपमा स्थापित गर्ने सङ्कल्प पनि बोकेको छ ।
जनताको बहुदलिय जनवाद पार्टीको मार्गदर्शक सिद्धान्तको रुपमा नेकपा एमालेले अंगिकार गरेको छ । जवजको मार्गदर्शक सिद्धान्तले प्रतिस्पर्धाबाट श्रेष्ठता हासिल गर्ने साथै आवधिक निर्वाचनका माध्यमले जनताबाट अनुमोदित हुुने कुरा उठाएको छ । विभिन्न १४ बुँदामा समेटिएको जवजको मार्गदर्शक सिद्धान्तले पार्टीलाई लोकतान्त्रिक धारका साथ अगाडि बढाउने, कानूनको शासन स्थापना गर्ने, मानव अधिकारको रक्षा जस्ता महत्वपूर्ण र परिवर्तनका संवाहकले प्रतिस्पर्धाबाट नेतृत्व प्राप्त गर्ने जस्ता सिद्धान्तहरु समेटिएका छन् ।
संगठीत सदस्य नै पार्टीको सम्पत्ती
यहि पृष्ठभूमीमा नवलपरासी जिल्लाको पार्टी संगठन, नयाँ नेतृत्व र नेतृत्वले लिनु पर्ने नयाँ कार्यदिशाबारे चर्चा गर्न खोजिएको छ । जिल्लाको सदरमुकाममा सुविधा सम्पन्न मनमोहन स्मृती भवनमा सचिवालय सञ्चालनमा छ, यो आफैमा पार्टीकालागि गर्व गर्न लायक विषय हो भने सात वटै पालिका भित्रका कुल ४ हजार ८२६ संगठीत सदस्य नै पार्टीको सम्पत्तीको रुपमा रहेका छन् । यस्तै १०५ सदस्यीय जिल्ला संगठन कमिटि, ७ सदस्यीय जिल्ला लेखा कमिटि, २ वटा निर्वाचन क्षेत्रीय कमिटि, सातैवटा पालिका कमिटि, ७४ वटा वडा कमिटि, २३ वटा जिल्ला स्तरका जनवर्गिय संगठन, विभिन्न इकाई, क्षेत्र र विद्यालय स्तरीय अखिल प्राकहरु, युवा, महिला, आदिवासी जनजातिभित्रका संगठन, पार्टीसँग आवद्ध विभिन्न पेशा व्यवसायिक संगठनहरु पार्टीकालागि मेरुदण्ड जस्तै हुन् । आज विभिन्न संगठनमा आवद्ध प्रतिवद्ध व्यक्तिहरुका बीचमा पार्टीले घनिभूतरुपमा संगठनात्मक सचेतना सञ्चालन गर्नु पर्ने देखिएको छ ।
मातहतका सवै संगठनहरुमा करेन्ट प्रवाह गरौ
नेता तथा कार्यकर्ताहरुको जीवनशैली, संगठनात्मक पद्दती, गोपनियता, सांगठानीक तथा व्यक्तिगत आचरण, द्वन्द्वात्मक भौतिकवादि चिन्तन प्रणाली जस्ता कम्यूनिष्ट आधारशिला तयार गर्नु पर्ने छ । अधिवेशनका बेला नेतृत्वको लागि हानथाप गर्नेहरुका लागि पार्टीकोे बैचारिक धरातलबारे ज्ञान हुनै पर्ने विधिको निर्माण गर्नु पर्ने देखिन्छ । “म कुन वर्ग, समूदाय कोहुँ, म कस्तो पार्टीमा आवद्ध छु, मेरो व्यक्तिगत जीवन र कार्यशैलीले पार्टीलाई पार्ने फरक के हो?, नेकपा एमाले र अन्य पार्टीबीचको बैचारिक भिन्नता केहो” जस्ता आधारभूत प्रश्नको जवाफ आज हरेक पार्टी संगठीत सदस्यले खोज्नै पर्ने देखिन्छ । यस्तै नेतृत्वमा पुग्नेहरुले पनि पार्टीको सिद्धान्त, सोंच, विचारधारा, जनतासँगको सम्बन्ध, नेतृत्वको कार्यशैली, जिम्मेवारी र उत्तरदायित्वबारे जान्नै पर्ने हुन्छ ।
जिल्ला कमिटिका प्रत्येक सदस्यहरुलाई परिभाषित कामको जिम्मेवारी दिने÷लिने र त्यसको अनुगमन मूल्याङ्कन गर्ने परिपाटीको विकास गर्ने, पार्टीभित्र प्राय हराइनै सकेको आलोचना÷आत्मालोचनालाई सुदृढिकरण र सुद्धिकरणको मूलकडिको रुपमा विकास गर्ने । नेतृत्वमा आएका नयाँ सोंच र शैलिलाई पार्टी नेतृत्वले सृजनात्मक प्रयोग गर्दै लैजाने जसले व्यक्तिहरुलाई संगठनमा आवद्ध पार्न सजिलो होस् । पार्टी नेतृत्वले आफू र आफू मातहतका सवै संगठनहरुमा करेन्ट प्रवाह गरौ, जागरुक वनाऔं, मासिक, त्रैमासिक, अर्धवार्षिक र बार्षिक योजनाहरु निर्माण गरी काम गरौ, थालौ र कामकाजी बनौं । सवै संगठनहरुमा आर्थिक पारदर्शितालाई विशेष ख्याल गरौं । सवै जनवर्गिय संगठनमार्फत पार्टीकामलाई चलायमान बनाऔं ।
नवलपरासीमा एमालेको नयाँ नेतृत्व निर्माणको विधि सर्वसम्मत अपनाइयो । त्यसमा सफल पनि भएको अवस्था छ । तर मुख्य नेताहरुले गुटनै चलाए पनि भन्ने सुनियो, पार्टीको आन्तरिक जीवनमा स्वच्छ प्रतिस्पर्धालाई खुला छोड्नु पर्दछ, अनिमात्र नयाँ नेतृत्वले अवसर पाउँछ ।
नयाँ नेतृत्व कामकाजी बनाऔं
पार्टी जिल्ला संगठनले प्रत्येक संगठीत सदस्य र नेताहरुको व्यक्तिगत प्रोफाईल तयार पार्ने र सोही अनुसार जिम्मेवारी र अवसरहरु दिने गर्न सके तेरो मेरो भन्ने हुँदैन । त्यो परिपार्टीको विकास गर्नु अत्यन्तै आवश्यक देखिएको छ । आफ्ना निकटलाई भ¥याङ्ग बनाएर आँटीमा चढ्ने परिपाटी बन्द गरेर सक्षम, इमान्दार र प्रतिवद्ध नेता तथा कार्यकर्ता निर्माणमा सिंङ्गो पार्टी लाग्नु पर्ने आजको आवश्यकता हो । काम गर्नेलाई पुरस्कार र नगर्नेलाई नैसियत दिने परिपार्टी बसालौं । संगठनलाई पूर्णतया विधि र पद्दती अनुसार सञ्चालन गरौं सदस्यको क्षमतानुसार जिम्मेवारी लिऔं दिऔं । नेकपा एमाले नवलपरासीको नयाँ नेतृत्व मात्र नेतृत्वको निरन्तरता हैन की पार्टीले आगामी दिनका लागि बोकेको कार्यदिशालाई लक्ष्यमा पुर्याउन सक्षम र सफल हुने छ ।
नयाँ नेतृत्वलाई पूर्णतया कामकाजी बनाउन सवै लागौ ।
