परासी । पाल्हीनन्दन ६ का राजनीतिक दल र वडाबासीले नन्दनतालको विकासमा शुक्रवार सामुहिक प्रतिवद्धता जाहेर गरेका छन् । उनीहरुले एतिहासिक एवं पर्यटकीय क्षेत्र नन्दन नगर र नन्दनतालको विकासले मात्र सनई क्षेत्रको विकास हुने हुँदा एकजुट भएर काम गर्ने प्रतिवद्धता गरेका हुन । शुक्रवार वडाको विकास निर्माण र सेवा प्रवाह सम्बन्धी सार्वजनिक सुनुवाई कार्यक्रममा यस्तो बताएका हुन् ।
लामो समयदेखि नन्दनताल र नन्दन नगरको कुरामात्र भएकाले यसको विकासमा अग्रसर हुनु पर्ने सरोकारवालाहरुले जोड दिएका हुन् । सरोकारवालाहरुले वडा अध्यक्ष कृष्णचन्द्र यादवलाई यथाशीघ्र नन्दनतालको विकासका लागि अगुवाई गर्न सुझाव दिएका छन् । अध्यक्ष यादवले वडाका विभिन्न राजनीतिक दल, नागरिक अगुवा र अन्य सरोकारवालाहरुबीचको भेला गरी नन्दनतालको संरक्षण र विकासकालागि सर्वपक्षिय समिति गठन गर्ने प्रतिवद्धता व्यक्त गर्नु भएको छ । यसैबीच वडावासीहरुले वडाको सडक, खानेपानी, शिक्षा, स्वास्थ्य र पर्यटनमा विशेष जोड दिन आग्रह गरेका छन् ।
सार्वजनिक सुनुवाईमा वडा अध्यक्ष यादव, कार्यपालिका सदस्य अनिता साहानी, वडा सदस्य हैदर अलि अन्सारीले वडावासीले उठाएका विभिन्न विषयमा जवाफ दिनु भएको छ । कार्यक्रममा वडा सचिव जगन्नाथ यादवले चालु आ.ब.मा गाउँपालिकाबाट प्राप्त बजेटको सिलिङ्ग, वडाको आम्दानी र सम्पन्न भएका विभिन्न योजनाहरुको बारेमा जानकारी गराउनु भएको थियो ।
सार्वजनिक सुनुवाईमा स्थानीय समाजसेवी राजेन्द्र साहानी, धरेन्द्र यादव, नरसिंह पछिमा थारु, जाकिर अन्सारी, रुपकला चौधरी, समिउल्लाह अन्सारी लगायतले बडाको विकास निर्माण र सेवा प्रवाहमा चासो व्यक्त गर्नु भएको थियो ।
सार्वजनिक सुनुवाई कार्यक्रम पाल्हीनन्दन गाउँपालिकाका ६ वटै वडामा सञ्चालन हुने र त्यसको सहजिकरण सामुदायिक रेडियो परासीले गरिरहेको गाउँपालिकाले जनाएको छ । यसअघि वडा नं. २ मा बैशाख २५, वडा नं. ३ मा बैशाख २७ गते कार्यक्रम सम्पन्न भएका छन् भने आउँदो बैशाख ३० गते आइतबार वडा नं. १ को रमपुरवामा गरिने बताइएको छ ।
